Jowai, Nohprah 22
Namar ka jingbym suitñiew jong ka Sorkar Jylla bad ka Jaiñtia Hills Autonomous District Court (JHADC) ïa ka hukum jong ka Ïingbishar ka jylla ban pyllait noh ïa ka tulop jong ki nongtrei hapoh hynriew bnai, ka JHADC Staff Association (JSA) ka la tied biang sa shisien ïa ka jingkhang jong ka Ïingbishar khnang ban pynbor ïa ka Sorkar bad ka JHADC ban pyllait noh mardor ïa ka tulop jong ki.
Ka JSA ka la leit buh ïa ka dorkhas jong ka ha High Court lyngba u muktiar jong ka, u Bah J. Shylla ha ka 11 tarik mynta u bnai bad ka la ujor da ka ‘Contempt Petition’ pyrshah ïa ka Sorkar bad ka JHADC.
Lah ban pynkynmaw hangne ba ka Meghalaya High Court ha u bnai Lber mynta u snem ka la pynbna ïa ka rai halor ka jingshim bishar ïa ka jingmudui jong ka JSA pyrshah ïa ka Sorkar Meghalaya bad ka JHADC.
Ka Ïingbishar ka la hukum ïa ka Sorkar ban pyllait noh ïa baroh ka pisa kaba dang sahteng bad jingïoh lum khajna sha ka JHADC hapoh hynriew bnai, bad ha kajuh ka por, ka la hukum ïa ka JHADC ban siew dep ïa ka tulop jong ki nongtrei hapoh hynriew bnai.
Ka jingap khmih lynti kaba haduh hynriew bnai kynthih jong ki nongtrei ka JHADC ka la kut noh khlem jingseisoh ha u bnai Risaw ba la dep namar na ka liang ka Sorkar Jylla kumjuh ka JHADC kim shym la pyntreikam ïa katei ka hukum jong ka Ïingbishar.
Hapdeng jong kine ki hynriew bnai kiba la dep, ki nongtrei ka JHADC ki la pynlong da ki jingïakhih kiba jai-jai kiba la bteng haduh lai sien ban kyrpad ïa ka Sorkar bad ki bor ba dei khmih ban pyllait noh ïa ka tulop jong ki.
Ka High Court ka la pynlong ïa ka jingsngap kaba nyngkong halor ka ‘Contempt Petition’ ba la ujor da ka JSA ha ka Sngi Ba-ar mynta ka taïew.
Watla katta namar ka jingbym don Advocate (s) na ka bynta ka Sorkar bad ka JHADC, kumta ruh ka ïingbishar kan sa pynsngew biang ïa ka rai ha ka 6 tarik u bnai Rymphang, 2024.
Ha kawei pat ka bynta, ki nongtrei ka JHADC ki la ïoh khyndiat ban pynhiar mynsiem hadien ba ka Executive Committee ka la pyllait ïa ka tulop jong ki haduh u bnai Ïaïong mynta u snem. Mynta ki la hap ban ap na ka bynta ka jingpyllait noh ïa baroh ka tulop kaba dang sahteng jong ki naduh u bnai Jymmang mynta ka snem.
