Nongstoiñ, Nohprah 22
Ka Journalist Association of West Khasi Hills (JA-WKH) ka pynpaw ïa ka jingsngewsih kthang halor ka jingkhlad ba kyndit jong u nongthoh khubor napoh ka distrik kaba la long shisha ka jingduh kaba khraw ïa ki para nongpathai khubor ym tang jong ka West Khasi Hills hynrei ka Jylla hi baroh kawei.
Ka kynhun ka phah ïa ka kyrwoh sngewlem sha ki bahaïing hasem, ka kurim, u khun bad ai ba u Blei ka jingsuk un ïai don ryngkat bad ki, khamtam ha kane ka por ba u lyoh badum u la wan kah noh ïa ka ïing sem jong ki.
Lah ban kdew hangne ba u Bah Ronalstone Syiem, Correspondent jong u ‘The Shillong Times’ na West Khasi Hills District u la khlad noh na kane ka sla pyrthei mynta ka step, 22 tarik u Nohprah, 2023 hapoh Woodland Hospital Shillong hadien ka jingshitom kaba la ban ïa u la katto-katne bnai.
U Bah Ronalstone Syiem u dei u khun jong ka Kong Rakhelda Syiem bad u Bah Kresmohon Diengdoh napoh ka shnong Mawkhlam-Nongpyndeng.
La kha ïa u Bah Ronalstone Syiem ha u snem 1986 bad mynta u shong u sah bad la ka kurim, Kong Ba-ailang Lyngdoh Nonglait bad la u khun ha ka shnong Upper New Nongstoiñ, West Khasi Hills.
Shuh shuh u Bah Ronalstone Syiem u dei uwei napdeng ki nongthoh khubor ba paw jong ka West Khasi Hills ïa kaba u la trei mynta la palat khatsaw snem kum u nongthoh khubor.
Na ka liang ki bahaïing ki la pyntip ba ka jingleit ontep ïa ka met ba dang sah jong u Bah Ronalstone Syiem kan long ha ka 24 tarik Nohprah, 2023 ha u lum jingtep ka Balang Presbyterian, Nongpyndeng ha ka por 2.30 baje nohphai sngi.
