Shillong, Nohprah 22
Ki ar ngut MDC kiba shong ha ka liang pyrshah ha ïingdorbar ka Khasi Hills Autonomous District Council (KHADC) kata uwei na ka UDP bad uwei u MDC shimet ki la shet kylla markhmat ïa ki MDC ka UDP hadien ba ki ïeng ban kyrshan ïa ka NPP haba kheiñ khlieh briew ban kyrshan ïa ka jingpynkylla ïa ka Khasi Hills Autonomous District Khasi Social Custom of Lineage Bill 2023.
Kine MDC kiba la shet kylla ïa ka UDP ki long u MDC na Nongpoh u Bah Balajied Rani bad u Bah Latiplang Kharkongor kum u MDC shimet na Nongthymmai konstitwensi.
Kane ka jingleit kyrshan jong kine ar ngut ki MDC ka la paw pyrthei hadien ba u Chairman u la phah kheiñ khlieh briew ban kyrshan ïa kane ka aiñ rew (Bill) kaba ki la ïeng na jaka shong ka liang pyrshah ban kyrshan ïa ka executive committee ba la ïalam da ka NPP.
Kane ka jingkheiñ khlieh briew ka dei namar u nongïalam ka liang pyrshah uba dei u MDC ka UDP na Sohra konstitwensi u Bah Titos Chyne um shym la weng noh ïa ka jingwanrah ban pyrshah ïa kane ka aiñ rew wat hadien ba la dep pynshai na u Symbud CEM ka KHADC u Bah PN Syiem.
Haba ïatai ha ïingdorbar ha ka dorbar tlang kaba la kut noh mynta ka sngi ka 22 tarik Nohprah 2023, u Bah Titos Chyne u la pynpaw namar ba ka jaidbynriew ka la shah knieh ïa ka khaïi-pateng um kwah ban shah knieh ha ka kam shongkha shongman.
U Bah Titos Chyne u la pynpaw namar um sngewïahap ban pynrung ïa ka kyntien ‘register’ ha ka jingpynkylla ïa ka Khasi Hills Autonomous District Khasi Social Custom of Lineage Bill 2023 namar um kwah ba ki kur kin long kum ki sengbhalang hynrei u kwah ban buh da ka kyntien ‘record’.
Haba ïakren bad ki nongthoh khubor hadien ba la wai ka jingïalang, u Bah Titos uba dei u nongïalam ka UDP ha KHADC u la ong ba ka jingleit kyrshan u Bah Balajied ïa ka EC haba kheiñ khlieh briew ka dei namar u sngewkhia ïa ka aiñ rew (bill) kaba la wanrah da u Bah PN Syiem hynrei um don kum kata ba un leit kyrshan ïa ka EC.
Watla u Bah Titos u dang kam ba u Bah Balajied u dang dei u MDC ka UDP hynrei ki khubor kiba thikna ki ïathuh ba u Bah Balajied u la dep leit ai jingkyrshan ïa ka NPP ha kine ki sngi. Kane ka la paw pyrthei mynta ka sngi ha ïingdorbar namar u la kyrshan ïa ki MDC ka NPP haba kheiñ khlieh briew.
