Shillong, Nohprah 22
U Executive Member (EM) ka tnat kam pynroi ka KHADC, u Bah Carness Sohshang u la ïathuh hapoh Ïingdorbar ba ka Sorkar Pdeng lyngba ka tnat Panchayati Raj ka la dep bthah ïa ki Autonomous District Council (ADC) kynthup ïa ka KHADC ban pynrung noh ïa ki projek kiba dei ban pyntrei lyngba ka Tied bad Untied grant kaba dei ban ïoh katkum ka bhah na ka 15th Finance Commission.
U Bah Carness u la ïathuh ïa kane haba jubab ïa ka jingkylli ba la wanrah da u MDC ka Mawkynrew u Bah Martle N Mukhim ha Ïingdorbar ha ka kynta kylli jingkylli ha ka sngi bakut ka dorbar tlang ha ka Sngi Thohdieng.
U Bah Mukhim u la kylli hato ka Sorkar Pdeng ka la dep mang bad pyllait ne em ïa ka pisa kaba mang kum ka Untied Grant jong u snem 2021-2022 bad 2022-2023 nalor ka Tied Grant jong u snem 2021-2022 (2nd installment) bad ka Tied Grant jong u snem 2022-2023 katkum ka bhah na ka 15th Finance Commission.
U Bah Carness u la ong ba ka tnat Panchayati Raj jong ka Sorkar Pdeng ka la bthah ïa ki ADC kynthup ïa ki ADC ha Meghalaya ban pynrung noh ïa ki projek ha ka egramswaraj portal, naduh u snem 2020-2021, hynrei ka Executive Committee kaba rim kam pat lah ban leh ïa kata.
U la ong ba ka don ruh ka jingpynkynmaw na ka Sorkar Pdeng ha kaba kata ka jingpynkynmaw ka wan ruh lyngba ka District Council Affairs ka Sorkar Jylla sha ka KHADC.
“Namarba ka rukom kam shah shuh, ngi hap ban ïaid lyngba ka egramswaraj portal bad ïa ka jingsiew ruh ym dei shuh ban siew mar-kti hynrei ban leh online. Kane ka la buh jingeh bad ngi la kyrpad ban pyllait ïa ngi khamtam haba ïadei bad ki skhim kiba la dep ban pyntreikam kham ha shwa,” la ong une u EM.
U la ong ba ha ka jingshisha la dei ban leh ïa kane kham mynshwa naduh kito ki snem 2020-2021 hynrei kam shym la long kumta.
U ïathuh ba ki briew kiba la wan na ka tnat Panchayati Raj sha Shillong ban ai jinghikai haba ïadei bad kumno ban pyndonkam ïa ka egramswaraj portal ha kaba la wan lang ki nongtrei na baroh lai tylli ki ADC.
Ha kawei pat ka liang, u Bah Carness u la ïathuh ba ka EC ka la thoh ruh sha ka Sorkar Jylla bad phah ruh sha ka tnat Panchayati Raj ba kan pyllait noh ïa u snem 2021-22 bad 2022-2023 ban nym ïaid lyngba ka egramswaraj portal hynrei ka tnat Panchayati Raj ka ong ba kan sa pyrshang ban pyllait, tangba naduh snem 2023-2024 yn nym lah shuh ban pyllait.
Halor ka jingkylli u MDC na Mawthadraishan u Bah Jambor War ba ka don ka jingpyntip (circular) ha ka 10 tarik Nailar, 2023 ba la phah ban pynpoi noh ïa ki jingtyrwa haba ïadei bad ka skhim lyngba ka Tied Grant kaba T.10 lak bad Untied Grant kaba T.30 lak, u Bah Carness u la pynshai ba ïa kane la leh namarba la bthah ka Sorkar Pdeng ban nang leh lypa da kaba phah lypa ïa ki jingtyrwa ha kaba ïadei bad ki projek ha kaba la batai lypa ruh ba ka pisa kam pat don.
U Bah Jambor u la kylli ruh halor ka jingthied trok kit ñiut ka Council, bad u Bah Carness u la ïathuh ba la thied lyngba ka pisa kaba la don lypa na ka Tied Grant namar ka ïahap bad ka khuid ka suba.
U Bah Carness u la ong kane ka dei ïa baroh kawei ka KHADC ha kaba la phah ïa ki jingtyrwa na kylleng ha ryngkat ka jingpynskhem muhor lang da ki MDC jong kano-kano ka thaiñ kaba phah ïa ki jingtyrwa.
Halor ka jingkylli u MDC ka Nongkrem u Bah Lambor Malngiang katno kawei ka konstitwensi kan ïoh na ka T.18 klur kaba dei ka Tied Grant kaba la don ka pisa, u Bah Carness u la ong ba ïa ki MDC jong kawei ka konstitwensi, la mang T.40 lak man uwei u MDC.
“Ngi la leh ruh ka pilot project ha Mawlai Mawroh bad ka tnat Panchayati Raj ruh ka bthah ban buh ki kor kompiwtor ban pynbiang ïa ka rukom treikam,” u la ong.
U Bah Mukhim u la ong ba haba la ai ‘resolution’ da ki dorbar shnong ban ïoh ïa ka skhim, ka dei ba la mutdur ba la don ka pisa, bad u la kylli ba ka don ne em ka lad ban ïoh skhim baroh ar tylli ki grant ha kane ka samoi ba mynta?
U Bah Carness u la ong ba ka EC ka la pyrshang ban leh ïa kane tangba ym lah ban kular lypa.
