Shillong, Nohprah 22
U MDC shimet na Nongthymmai konstitwensi Bah Latiplang Kharkongor u la ong ba ka jingleit kyrshan ïa ka Executive Committee ba la ïalam da u Bah Pynïaid Sing Syiem ha KHADC ka dei namar u la wanrah ïa ka resolution ban dawa na ka sorkar ban ithuh Schedule Tribe tang ïa ki jaidbynriew ba dei trai shnong ha Meghalaya ym shuh ïa ki riewlum kiba wan na kiwei ki jylla.
U Bah Latiplang u la ong kane ka jingïakren shaphang ki Schedule Tribe kiwei pat ki riewlum kiba sah ha jylla ka dei kaba la slem bad dei halor kane ka nongrim u ai jingkyrshan ïa u Bah Pynïaid Sing Syiem.
U la ïathuh ba ha ka EC barim u la kyrshan haba u wanrah ïa ka phang kaba ïada ïa ka jaidbynriew.
“Nga khlem rung ha por ba u Bah Pynïaid u thaw ïa ka EC bathymmai bad ka Congress namar nga peit shwa ïa ka jingtreikam” u la ong.
U Bah Latiplang u la ong wat ka ïingbishar ba ha khliehduh ka Supreme Court ka la dep ai ïa ka hukum, kumta ka sorkar jylla ka la lah ban pyntreikam ban ithuh Schedule Tribe tang ïa ki trai jylla.
Nalor kata, u la ïathuh ba ki riewlum kiba sah ha kiwei ki jylla lada ki wan sah ha Meghalaya ki ïoh syrnod riewlum ha Meghalaya bad ki ïoh ruh ban thied jaka bad khaïi laitluid.
Namar kata, u la ïathuh haba u leit kyrshan ïa u Bah Pynïaid kum u CEM ka KHADC um donkam ban pyntip ïa u Bah Titos Chyne uba dei nongïalam ka liang pyrshah namar u dei MDC shimet.
