Shillong, Nohprah 22
U nongwad RTI ka Jylla, Bah Disparsing Rani u la ong ba ka Meghalaya Transport Corporation (MTC) ka la pynkha biang ïa ka kam Assistant General Manager (AGM) wat hadien ba la pynduh noh ïa ka kumba 7 snem mynshuwa.
“Katkum ka jingpynbna ha ki lad pathai khubor halor ka jingpyn-kha ïa ka kam bathymmai ha katei ka tnad treikam – AGM, ha ka jingshisha ïa kane la pynduh naduh 2016 lada ngam bakla,” la ong u Bah Rani haba pynsngew ïa ka kaiphod RTI ha ka Sngi Thohdieng.
U la kynnoh ruh ba ka jingpynkha biang ïa katei ka kam ka lah ban don eiei sha lyndet naba mynshuwa, na u Depot Manager la lah ban kiew kyrdan sha u Deputy General Manager.
“Hynrei kane ka jingpynbna ban ai kontrak ïa ki 2 tylli ki kam – kane ka la wanrah jingeh ïa kito kiba la skhem ha ka kam bad kiba dei hok ban kiew kyrdan ha katei ka kam,” u la ong da kaba kynnoh ba kine ki nongtrei kontrak na bynta 2 snem kin dei ki ‘Stuntman’ jongno-re-jongno.
U Bah Rani u la pynkynmaw ruh ba hashuwa, ka la don ka ejahar na ka liang ka FKJGP halor ka jingtied ïa ki tiar kali kiba tad, ha kawei ka liang kaba wanrah ïa ka jingduhnong ïa ka tnad.
Ha kawei ka liang, ka RTI kaba la ïoh pdiang ka kdew ruh ba ki kam kiba lait ha katei ka tnad treikam ki don 15 tylli bad ki don 112 ngut ki nongtrei kiba la skhem ha ka kam, 62 ngut ki nongtrei kontrak bad 20 ngut ki nongtrei ‘dor sngi’.
U la ong ba ka RTI ka la thoh ruh ba yn sa lah ban pyndap ïa ki kam basah thylli hadien ka jingpynkiew kyrdan.
Halor ka jingdon jong ki kali ba la lilam, u Bah Rani u la ong ba naduh u snem 2019 haduh 2024, la lilam ïa 9 tylli ki kali bad ka jingmih na katei ka jinglilam ka long tang T.9, 01,000.
“Kane ka dei kaei-kaei kaba wanrah ka jingduhnong ïa ka MTC,” u la ong.
Haba pynsngew ba ki don kumba 30 tylli ki kali thymmai hapoh ka MTC, utei u nongwad RTI u la pynpaw ka jingeh ba lada ka tnad ka dang ai lad ïa ki ‘Home-made Cash Memo’ – kaba long tang ka jingai ïa ka ‘slip’ jingmynjur ïa kaba ka tnad ka shu pdiang ïa kane, kata kan ïalam sha ka jingduhnong.
“Baroh kine ki jingdon-jingem jong ka Sorkar balei ki khyllem, naduh ka MCCL, MeECL bad MTC, kiba bun ki ‘Cash Memo’ kim lah ban pynshisha ba ka tiar ka long kaba bit ba biang bad ba shisha,” u la ong.
Haba ïadei bad kane, u la ai jingmut ïa ka Sorkar Jylla ban pynmih noh ïa kawei ka soskular kaba long ryntih ïa baroh – ba ïa ki tiar dei ban thied beit ha ryngkat ka ‘Cash Memo’ kaba tikna.
Katei ka RTI ka pyni ruh ba ka jingmih na ki skul bos jong ka MTC ha ka shi bnai, ka long kumba T.5, 17, 750.
Shuh shuh u la bynrap, “Ka jingsiew pat na bynta kito kiba la shongthait na katei ka tnad, ka poi haduh T.6,08,75,549.”
