Shillong, Nohprah 22
Ka jingshah tuh jong ki thuk-thuk bad ar shaka ha ki bynta bapher-bapher ka jylla ka dang bteng haduh kine ki sngi.
Katkum ka khubor na ki pulit, ha ka Sngi Thohdieng, ki runar ki la tuh ïa ka thuk-thuk (ML-10C-1908) kaba dei jong u Evan Robert Syiemlieh na ïing sah jong u ha Golf Links, Shillong.
Ha kawei pat ka jingjia, u Eugene Nongkynrih u la ujor ba ha ka 17 tarik Nohprah, ki runar ki la tuh ïa ka Mobile Phone na ka ïing sah jong u ha Wahingdoh Block-III, Shillong.
Nangta ha kawei pat ka jingjia, u Sammy N Myrthong, u la ujor ba ha ka 19 tarik Nohprah ha ka por kumba 3.40 mynstep, ki runar ki la tuh ïa ka thuk-thuk jong u kaba la pynïeng hakhmat ka ïing sah jong u ha Lumshatsngi, Shillong.
Ki pulit ki la pyntip ba u Herod D Sangma u la ujor ba ha ka 21 tarik Nohprah, u la lap ba ka thuk-thuk jong u (ML-08E-1832) ka la jah na Dobasipara, Tura.
Ha ka 21 tarik Nohprah, u Lunlien Haolai u la ujor ba ha ka 20 tarik Nohprah ki runar ki la tuh ïa artylli ki Battery Solar bad artylli kiwei pat ki Battery kiba shongdor T. 46,200 na ka ATM kaba don ha Fire Brigade, Shillong.
Shuh shuh ki pulit ki la ïathuh ba u Prakash Hareh u la ujor ba ha 18 tarik Nohprah ha ka por kumba 10 baje mynmiet, ki runar ki la tuh ïa ka thuk-thuk (AS-05U-1888) na ka ïing sah jong u kaba don ha Lower Nongrim Hills, Shillong.
Nalorkata, u George Massar, Engineer OSGT Consortium, u la ujor ba ha ka 18 tarik Nohprah, ha ka por ba la pynlong ïa ka jingpeit bniah, la shem ba saw tylli ki Motor Pump ryngkat bad kiwei ki tiar ki tar ba la buh ha ka Treatment Plant bad ka top um ha ka shnong Sabah-Muswang, West Jaiñtia Hills ki la shah tuh.
Ha kawei pat ka jingjia, u Raben Sangma u la ujor ba ha ka 12 tarik Nohprah ha ka por kumba 2 baje mynstep, ki runar ki la tuh ïa ka kali Bolero Pick-Up (ML-07B-3327) ba la pynïeng hajan ka ïing sah jong u ha ka shnong Wagopgre ha East Garo Hills.
