Shillong, Nohprah 22
U Lyngdohsad lane Archbishop ka Jylla-Niam Bah Shillong ka Balang Katholik, u Most Rev. Victor Lyngdoh, ha ka Sngi Thohdieng u la ong ba ïa kiba shongkha para kynthei ne shynrang, u Lyngdoh Katholik u lah ban kyrkhu, hynrei kan ym don ka jinglehniam jong ka Balang ka ban ïadei kyrdan kum ka Sakrament Jingkyntiew Kurim.
Ha ka shithi ba u la thoh sha ki Lyngdoh, Riewniam bad Parabangeit ka Balang Katholik ha ka Jylla-Niam Bah, u Lyng-dohsad u la ong, “Ka Balang Katholik ka la pynmih paidbah ïa ka dulir “Fiducia Suppli-cans” ha ka 18 tarik Nohprah 2023 lyngba ka “Dicastery for the Doctrine of Faith” kaba la ai jingbit da u Kpa Bakhuid, u Pope Francis.”
U Lyngdohsad u la ong ba da kane, u Lyngdoh Katholik u lah ban kyrkhu ïa kiba shongkha “ym katkum ka aiñ jong U Blei”, bad kan ym don ka jinglehniam jong ka Balang ka ban ïadei kyrdan kum ka Sakrament Jingkyntiew Kurim. Ka riti lehniam jong ka Sakrament Jingkyntiew Kurim ka dei tang na ka bynta ka jingïalong kawei jong u shynrang bad ka kynthei ha ka jingïateh jutang ba shijunom.
Shuh shuh u Lyngdohsad u la ong ba kane ka dulir ka thew ïa ka jingmut jong ka jingduwai kyrkhu. Kane ka dei ka jingduwai kaba u Lyngdoh u lah ban duwai hi khlem da shim ïa ka jingduwai jong ka Balang. Ïa kane ka jingduwai kyrkhu ym dei ban sngewthuh bakla ba kane ka dei jinglehniam jong ka Sakrament Jingkyntiew Kurim jong ka Balang Katholik, la bynrap u Lyngdohsad.
Na kata ka daw, u la ong ba kane ka dulir ka khlem pynkylla ïa ka aiñ tynrai jong ka Sakrament Jingkyntiew Kurim ha ka Balang Katholik bad ka jingduwai jong u Lyngdoh “kam mut ba u mynjur ne pynshlur ïa ka jingleh jong ki”.
Ha kajuh ka por, u Lyngdohsad u la kyntu ïa ki parabangeit ba kin ïai bat barabor ïa ka jinglong bakyntang jong ka Sakrament Jingkyntiew Kurim. Nalorkata, u la ai ka jingkhublei Khristmas bad Snem Thymmai ïa baroh.
