Shillong, Nohprah 22
U nongwad RTI ka Jylla, u Bah Disparsing Rani u la ong ba ka tnad kam jngoh kai pyrthei hapoh ka Jylla kam don ïa ka mat treikam kaba janai na bynta ban lum khajna na ki nongwan jngoh kai pyrthei kiba wan nabar.
“Na ka liang jong nga, nga ïohi ba kane ka tnad kam jngoh kai pyrthei hapoh ka Jylla kam don ka mat treikam kaba janai na bynta kumno ban lum pisa na ki nongwan jngoh kai pyrthei ba wan nabar,” la ong u Bah Rani haba kren sha ki lad pathai khubor ha ka Sngi Thohdieng.
U la ong ruh, “Na ka liang jong nga, nga ïohi ba kane ka kam jngoh kai pyrthei ka pynlong pynban ïa ka Jylla jong ngi kum ka jaka bret ñiut.”
Haba pynkynmaw ba ha ka por u Bah R.G. Lyngdoh (Bam Kwai ha Dwar U Blei), ka la don ka jingpyrkhat ban wanrah noh da ka ‘3 Tier Card System’ (Jyrngam, Stem bad Saw), u la ong kane kan pynithuh katno ngut ki nongwan jngoh kai pyrthei ki wan sha ka Jylla ha ka shi snem.
“Ha kane ka tamasa ‘Cherry Blossom’, ki ong 75% ki dei ki briew kiba nabar… nangno phi tip ïa kata? Hynrei lada don ka mat treikam ne ka aiñ kaba la pynrung ha ka tnad kam jngoh kai kum ka ‘3 Tier System’, kata kan ïarap ïa ka tnad kumno ban lum pisa bad kumno ban ai kam ïa ki briew lajong,” u la ong.
U Bah Rani u la ong ruh ba ki Jylla ‘riewlum kim don jingeh ban thaw ïa ki aiñ namar ka jingshngaiñ jong ki ‘riewlum ka kham kordor bad kumta lah ban shna kano-kano ka aiñ ha ka kyrteng jong ka jingshngaiñ jong ki ‘riewlum.
“Ym don ka aiñ India ka ban long ryntih hapoh ki Jylla ‘riewlum,” u la ong.
Haba kdew ba ka jingïabishni hapdeng ka KHADC bad ki Hima ka pynduhbor ïa ki Hima, utei u nongwad RTI u la ong ba ki Hima ha ka jingshisha ki don ka iktiar ban lum bai musur na kino-kino ki briew kiba nabar kiba wan shapoh shnong.
Haba ïadei bad ka RTI halor ka ‘Cherry Blossom’, u la ong ba na ka liang ka tnad kam jngoh kai ka la pynlut kumba T. 1 klur ha u snem 2021 na bynta katei ka tamasa, katba ha u snem 2022, ka la pynlut kumba T.1 klur, 99 lak, hynrei ka tnad ka la kdew pat ba ha une u snem ka la don ka jingpynwit namar ka jingjia ha Mukroh bad kumta ym shym la pynlong ïa ka tamasa ha ka rukom ba dei.
“Na bynta u snem 2023…ka jingpynlut na bynta ka ‘Cherry Blossom’ ka poi kumjuh – 1 klur 99 lak,” u la ong.
Halor ka jingsiew ïa ki nongtem kiba wan sha ka Jylla, u Bah Rani u la ong ba ka tnad ha katei ka RTI ka la ong ba kam shym la peit ïa katei ka bynta hynrei la siew ïa ki nongtem da ki nongpynïaid ka tamasa ‘Cherry Blossom’.
“Haba ïadei bad ka jingmih na ka ‘Cherry Blossom’, na ka liang ka Sorkar ka ong ba kam don jingmih na ka Cherry Blossom wat shi naïa haba ïadei bad ka jingpynlut na bynta kane ka tamasa, hynrei ka don pat ka jingbuhthong na ka tnad ba ka jingpynlong ïa ‘Cherry Blossom’ ka dei ka lad ban khring ïa ki nongwan jngohkai pyrthei,” u la ong.
Shuh shuh u la ong ba ka thong jong ka tamasa ka long ruh ban ai kam ïa ki briew lajong kiba don sap ha ka put ka tem.
