Shillong, Nohprah 22
Wat la ka jingbuhpor ban lilam lut hapoh jong une u Nohprah mynta u snem ïa u dewïong ba la dep tih, hynrei ka jinglilam bad shalan kan bteng shaduh u Kyllalyngkot 2024.
Ka tyllong khubor ka ïathuh ba u dewïong ba la dep tih ym pat lah lut ban lilam bad ban shalan namarba ki don ki khep ba u dewïong ba la buh ban lilam, u sahteng noh namar ym shym la don kiba ïashimbynta bad lada don kiba ïashimbynta ruh ki kynran dien noh, ym lah ban pynïaid shakhmat ban lilam sha ki nongthied.
La ong ba ynda la dep lut ban lilam ïa u dewïong ba dang sah baroh, bad lada dang lap ba don dewïong hangne hangtai hadien kata, ka aiñ kan treikam ban shu kurup beit namar la ñiew ba u dei u dewïong beaiñ.
La khmih lynti ba lada ka kam ka ïaid beit khlem sahteng, ka jingtih dewïong katkum ka juk stad saïan kan sa sdang noh shen ha u snem thymmai.
Kumba ka long mynta, la pyllait ban lilam ïa u dewïong ba la ïoh kurup uba lajan kot sha ka 2 lak metric ton (MT), bad ka jingai challan na ka bynta u dewïong ba ïoh kurup ka la ïaid, nalor u dewïong ba la dep tih ba ka Coal India Limited ka dang thmu ban lilam.
Kumta ka jingpyllait ban shalan ïa u dewïong na kane ka Jylla ka dang ïaid mynta.
