Jowai, Nohprah 28
Kum shibynta jong ka jingleh burom ïa ka lyngkhuh snem ïap ba 161 U Kiang Nangbah ka ban long ha ka 30 tarik Nohprah, ka Khynroo Khyllood Committee Loomkyrwiang Dorbar Shnong ka la pynlong da ka jingïakob dro dur bad thoh poitri ha ka 23 tarik Nohprah.
U Bah Lewansa-O Laloo, Secretary Khynroo Khyllood Committee Loomkyrwiang Dorbar Shnong u la ong, ka jingpynlong ïa ka jingïakob ka long shibynta ban khring ne pynrung ha ka pyrkhat pyrdaiñ jong ki khun ka dong ka shnat shaphang u Kiang Nangbah ba u dei u khlawait ka Ri Pnar-Ri khat-ar Dolloi ba la ïap ha u tyllai phasi ka sorkar Phareng.
Shuh shuh u la ïathuh ba ha ka 30 tarik Nohprah, ka Dorbar Shnong ka la rai ban pynlong da ka jingïalang kynmaw burom ïa ka lyngkhuh snem ïap ba 161 ha iungwalieh ha kaba yn don ruh ki jingkren na ki ’riew rangbah nalor ki prokram ba ïadei bad u Woh Kiang Nangbah.
