Shillong, Nohprah 28
Ka BJP Meghalaya Kisan Morcha dang ha kine ki khyndiat sngi kiba la leit, ka la ïoh ban rakhe ïa ka sngi kyrpang ki nongrep lane ka National Farmers’ Day 2023 hapoh ka shnong Liarkhla kaba hap hapoh ka Umroi Constituency, Ri-Bhoi district.
Ha kane ka sngi, kum shi bynta jong ka jingrakhe, ka la don ruh ka jingai jinghikai halor ka rukom rep tit lane ‘Orientations on National Mushroom’s Day’, ‘Integrated Pest Management’ bad ‘Promotions jong ka IPM halor u khaw bad ki jhur kiba ki trai ri trai muluk ka Jylla Meghalaya ki ju rep.
Ki nongrep ki la ïoh ruh ka jinghikai halor ki skhim bapher bapher kiba ka Sorkar Pdeng ha ka jingïalam ka BJP ka la wanrah na ka bynta ka bha ka miat ki nongrep khamtam kiba hapoh ka Jylla Meghalaya.
Ha kane ka sngi la sam ruh da ki dawai bad ki symbai jhur ki ban ïada ïa ki mar rep na ki jait khñiang.
Ïa kane ka prokram la pynlong hapoh ka jingïalam da u President ka BJP Kisan Morcha ka Meghalaya u Bah Ralden Bryan Shabong, ryngkat ka jingdon lang u BJP Kisan Morcha Vice President Bah Duruth Majaw, u President ka Ri-Bhoi District BJP Kisan Morcha Bah Sen Thabah, Ri-Bhoi District Secretary ka BJP Kisan Morcha Freddie Kurbah bad Ri-Bhoi Mandal President ka BJP Kisan Morcha Remius Kharsati, Meghalaya BJP Vice President u Khrawboklang Basaiawmoit bad BJP National Council Member u David Kharsati.
Ha kane ka sngi la don lang u State BJP General Secretary u Evarist Myrsing bad kiba la wan ban shim bynta lang ki kynthup ïa u Dean ka CAU, ki Agriculture Scientists bad ki nongrep ka thaiñ Eastern Ri-Bhoi.
