Shillong, Nohprah 28
Ki kot pule ki khynnah skul kiba shon ha kyrteng jong ka National Council of Educational Research and Training (NCERT) yn sa pyllait noh ha u Kyllalyngkot hashwa ba sdang long skul ha kane ka Jylla.
Ïa kane la ïathuh da u Myntri ka tnat pule puthi u Rakkam A Sangma ha kaba ka jingpyllait ïa ki kot kan long ha Tura kaba dei ruh ka nongbah ba don ka shlem treikam baheh duh ka Meghalaya Board of School Education (MBoSE).
U Rakkam u la ong ba ka jingïalang kaba heh yn pynlong ha ka 16 tarik Kyllalyngkot 2024 bad ha kane ka sngi yn aiti ruh ïa ki kot thungkam nonghikai sha ki nonghikai kiba dei ban hikai ha ki skul ha Rilum Garo.
U la ong ba ka jingthungkam ïa ki nonghikai lyngba ki sub division ha Rilum Garo ki bun kiba la dep bad ïa ki kot thungkam yn pyllait syndon ha katei ka sngi kum ka jingaiti sha ki nonghikai.
Kiba bun ki skul kiba hap hapoh ka jingpeit jingkhmih ka MBOSE kin sdang long skul ha u Rymphang 2024.
U Rakkam u la ong ba ka jingpynrung kam nonghikai ka long palat 1300 ngut ha baroh kawei ka Jylla bad ka kam ka dang ïaid ha kiwei ki sub division bad ïa ki kot thungkam ha Rilum Khasi Jaiñtia ruh yn sa pyllait noh shen ynda la dep lut ka jingpynrung kam.
Kum ban pynkynmaw, ka Sorkar Jylla ka la rai ban pdiang noh ïa ki kot pule kiba dei ha ka kyrteng jong ka NCERT naduh klas-I haduh klas-X bad ïa ki kot pule jong ki khynnah klas-I haduh klas-V yn hap ban pynbeit katkum ki jingdonkam khamtam ban shon ïa ki kot ha ki ktien kiba kren ha kane ka Jylla kum ka ktien Khasi bad Garo.
Ka rai ban pynrung da ki kot pule NCERT ka long ban kham pynjanai ïa ki lynnong kot khamtam ban ïa beh lang sha ka thong bad kiwei pat ki khynnah skul kiba ju pule da ki kot pule NCERT ha kiwei pat ki Jylla jong ka ri.
