Shillong, Nohprah 28
Hapdeng ka jingpynkhreh ka sorkar jylla ban khang dam noh ïa ka Mawmluh Cherra Cements Limited (MCCL), ka la don ka jingujor ba ki runar ki la prong sha ka shlem treikam jong kane ka karkhana bad ki la tuh ïa ki tiar ki tar.
Katkum ka jingujor ba la ai sha ki pulit ha ka 27 tarik Nohprah, u Assistant Manager ka MCCL u la kynnoh ba ha ka miet jong ka 24-25 tarik Nohprah, ki runar ki la leit sha kane ka karkhana bad ki la rung sha ka bynta kaba dei jong ka Laboratory & Chemical bad Office Section.
La kynnoh ba ki runar ki la tuh noh ïa 36 tylli ki tiar ki tar ba pyndonkam ban peit bniah ïa ka dewbilat, artylli ki Tachometer lane u jingthew ïa ka jingsted ka ‘Engine’, lai tylli kita ki ‘Platinum Crucible’, artylli ki baje bad kiwei-kiwei.
Lah ban kdew ba ka sorkar jylla ka la pyni dak ban khang noh ïa ka MCCL hadien ka jingbym lah ban pynkhie im biang ïa ka wat haba la dep ban theh palat T.300 klur eiei ha ki 15 snem ba la leit noh.
