Shillong, Nohprah 28
Ka shnong Nongjrong kaba la bna nam bad khring bha ïa ki nongjngohkai bad kaba tip ruh kum ka shnong ba mih ka sngi bad jaka shong ki lyoh, kan sa ïoh ban pynlong ïa ka tamasa sohniamtra ha u snem thymmai. Ïa kane ka tamasa yn pynlong da ka Mawkynrew Tourism Sociable Society (MTSS) ha ryngkat Dorbar Shnong Nongjrong lyngba ka jingbtin lynti lang u MLA ka Mawkynrew u Bah Banteidor Lyngdoh.
Ïa kane ka tamasa yn pynlong ha ka 9 tarik bad 10 tarik Rymphang 2024 ha kawei ka jaka kaba itynnad kaba kyrteng ka Madan Weilyngkut kaba harud jong ka Wah Umngot.
Kum ka jingpynkhreh ïa kane ka tamasa, na ka liang u MLA u Bah Banteidor Lyngdoh ha ka 26 tarik mynta u Nohprah, ha ryngkat ki nongkitkam ka Dorbar Shnong Nongjrong bad ki nongkitkam ka Mawkynrew Tourism Sociable Society, u la leit sha shnong Nongjrong ban peit ïa ka jaka ban pynlong ïa ka tamasa sohniamtra bad ban sngewthuh lypa ïa ki jingdonkam kiba bun.
Na ka liang u Bah Banteidor u la pynpaw ka jingkmen ba ïoh ban pynlong ïa kane ka tamasa bad kane kan ïarap ban nang kyntiew ban pynïaid ïew ïa u sohniamtra uba mih na Nongjrong nalor ka kam jngohkai pyrthei kaba ki briew ki la tip bad bna na shaphang ka shnong Nongjrong.
U Bah Banteidor u la ïathuh ruh ba ka jingpynlut pynsep kan long kumba T.15 lak ei ei bad ïa kane yn sa kyrshan lang ka Sorkar Jylla lyngba ka tnat jngohkai bad u Myntri Rangbah nalor ma u kum u MLA ka thaiñ.
Na ka liang u Rangbah Shnong ka Nongjrong, u Bah Pynshai Synjri u la ïathuh ba ka jingthmu ban pynlong kum kane ka tamasa ka la don naduh u snem 2018 hynrei ka lad kam pat plie bad dei lyngba ka jingshimkhia jong u MLA Bah Banteidor Lyngdoh ba la ïoh ka lad ban pyni ïa ka shnong Nongjrong sha ka pyrthei ha kaba la shna ïa ka jaka peitkai kaba khring ïa ki briew ban wan peit lyoh bad ïa ka jingmih ka sngi ha ka por mynstep.
Ka shnong Nongjrong ka dei kaba paw bha ha ka jingpynmih ïa u sohniamtra, bad napdeng ki shnong ha Rilum Khasi Jaiñtia kiba pynmih ïa u sohniamtra, ka shnong Nongjrong ka dei kaba kham kyrpang namarba u sohniamtra u dang ïaid ïew ha u bnai balai lane Lber haduh u bnai basaw ne Ïaïong.
Ka jingpynmih sohniamtra ki nongrep ka shnong Nongjrong ka long kumba 40 hajar metric ton shisnem.
U Bah Synjri u la ong ba kane ka tamasa kan plielad ïa ki nongrep sohniamtra ha ka ïew ka hat bad ban rep ïa u sohniamtra namar kumba long mynta ki nongrep ruh ki dang rep khlem kano kano ka jingshemphang ne rep janai.
Ha kawei pat ka liang, u Rangbah Shnong ka Nongjrong u la pynpaw ka jingdiaw halor ka jingdon kiba kheit ïa u sohniamtra na kper soh jong ki nongrep bad u kyrpad ïa ki nongjngohkai ban nym kheit ïa u sohniamtra namar ki nongrep ki shaniah ban bsa khun bsa kti bad ïoh jingkamai na u sohniamtra uba ki ïoh ban die shisien shisnem.
U Bah Olet Kharsahnoh uba dei u Secretary ka MTSS u la ong ba ka thaiñ Mawkynrew ka don shibun ki mar rep kiba ka pynmih. Ïa kine yn sa pyni ha kane ka tamasa sohniamtra ka ban long ka jingmyntoi ïa ki briew jong ka thaiñ khamtam ki nongrep kiba rep soh bad ki shna ïa ki kynja jingbam ba bunjait naduh ki umsoh, chip bad kiwei kiwei.
