Shillong, Nohprah 28
Ki pulit ki la ïoh jingujor ba ha ka step jong ka 26 tarik Nohprah ki runar ki la rong noh ïa saw tylli ki shaka na ka kali kamai jong u Kitboklang Khongwir na Lawjynriew Nongthymmai katba ha kawei pat ka jingjia, u Chandan Saha, u la ujor ha ka 26 tarik Nohprah ba ki runar ki la tuh ïa uwei u ‘Battery’ bad 15 tylli ki ‘Cell’ na ka jaka ba buh ïa u ‘Tower’ ha Goramara, West Garo Hills.
Ha kawei pat ka jingjia, u Ajay Paul, u la ujor ba ki runar ki la tuh ïa ki mar ki mata kiba shongdor kumba T. 30,40,435/- na ka ATC Site kaba don Zikzak Goldatgre (South West Garo Hills).
Shuh shuh u Robert Syiemlieh u la ujor ba ha ka 21 tarik Nohprah, ha ka por kumba 8:30 mynmiet, ki runar ki la tuh ïa ka thuk-thuk (ML-10C-1908) na ïing sah jong u ha Golf Links Khliehshnong, Shillong.
Nalorkata, ha kawei pat ka jingjia, u Deepak Surana u la ujor ba ha ka 20 tarik Nohprah, ki runar ki la tuh noh ïa ka Laptop na ka ïing sah jong u ha Ferndale Apartment, MG Road, Shillong.
Ha kawei pat ka jingjia, ki pulit ki la ïoh jingtip ba ha ka 23 tarik Nohprah ha ka por kumba 9:45 mynmiet, ki runar ki la leit prong ha ka ïing sah jong ka Sumitra Nongkynrih ha Sunny Hills, Shillong bad ki la tuh ïa ki jingdon jingem ba rem dor.
Ha ka 24 tarik Nohprah, ki BSF ki la ïoh bat ïa uwei u nong Bangladesh, u Md. Shamim, na ka thaiñ Kanai bad ki la aiti noh ïa u sha ki pulit ka thanat Rongara ha South Garo Hills.
Sa ha kawei pat ka jingjia, u Hemanta Kr. Hajong, u la ujor ha ka 26 tarik Nohprah ba ka thuk-thuk jong u (ML-08E-1065) ka la jah na ka shnong Kuligaon (South West Garo Hills).
