Shillong, Nohprah 28
Ka KSU Laban Circle ha ka janmiet jong ka Sngi Palei ka la leit kyndang ïa kawei ka ‘Shelter Home’ kaba don ha Kenches Trace (Harrison Bridge) hadien ba la saphriang ka dur khih ha ki rynsan ‘Social Media’ ba bun ngut ki briew ki ju ïadih bad ïadie drok ha kata ka ‘Shelter Home’.
Katkum ka khubor na ka KSU Laban Circle, la ong ba la ïoh jingtip ruh ba kane ka Shelter Home ka dei ka jaka ban leh kam awria bad ka long lyngkar haduh katta katta ba ym don ba peit ba khmih ïa kane ka jaka na ki bor pynïaid jong ka Shillong Municipal Board.
Mar ïa ïoh jingtip halor kane ka jaka, ki dkhot jong ka jylli ryngkat ka jingsynran ki pulit jong ka thanat Laban ki la hiar jurip, bad la lap ïa ki thyrnia (syringe) bad ki kyndok buh drok, hynrei ki briew kiba ïadih ïadie drok kim shym la don shuh ha kane ka jaka.
La ïathuh ruh ba la ïoh ïa ki kyrteng jong ki briew, kynthei bad shynrang, kiba ju mlien ïa kane ka kam bad la aiti noh sha ki pulit ka thanat Laban ban leh ïa kaba donkam.
Ka KSU Laban Circle ka la ong ba ha kine ki sngi kan leit buh jingthoh sha u CEO ka Shillong Municipal Board ba dei ban buh noh da ki bor pahara ha kane ka jaka bad dei ban pynmih noh mar-mar ïa ki briew kiba donkti ha kum kine ki jait kam bad nangne shakhmat hashwa ban ai jaka sah ïa kino-kino ki briew, dei ban da jurip bniah shwa.
