Shillong, Nohprah 28
Ka Sorkar India, Sorkar Assam bad ki nongïalam ka seng United Liberation Front of Assam (ULFA) kin ïasoh ïa ka soskular (Memorandum of Settlement) ha ka Sngi Thohdieng ha ka por 5 baje janmiet ha nongbah New Delhi.
Ha kane ka sngi, yn don lang u Myntri Korbar Ri, u Amit Shah, u Myntri Rangbah ka Assam, u Himanta Biswa Sarma lem bad ki nongïalam ka ULFA ba la khlieh da u Arabinda Rajkhowa.
Ïa ka jingïasoi ïa kane ka soskular la pynbna da ka sorkar Assam ha ka miet jong ka Sngi Palei.
La khmih lynti ba katei ka soskular kan pynbeit ïa kiba bun ki mat ki jura kiba ïadei bad ka saiñ hima sima, ïoh ka kot bad kiwei ha Assam. Ha kajuh ka por, ki lah ban don ki mat ki ban ai jingïada kyrpang ïa ki trai ri trai muluk kiba shong ba sah ha Assam.
Hynrei ha kane ka jingïasoi ïa ka soskular, ka kynhun ULFA ba la ïalam da u Paresh Baruah kan ym ïadon bynta lang. Kane ka kynhun u Baruah ka la ïai kyntait na ka por sha ka por ban ïakren ïasuk bad ka sorkar.
Ki nongïalam ka ULFA ba la khlieh da u Rajkhowa kum u Anup Chetia bad u Sashdhar Choudhary ki la leit sha New Delhi ha ka taïew ba la lah ban ïapynbeit khatduh ïa ki mat bad ki ksiang jong ka sorkar.
Ki heh sorkar kiba la ïadon bynta ha ka jingïakren bad ka ULFA ki long u Director ka Intelligence Bureau, u Tapan Deka, bad u nongaibuit ka sorkar halor ki kam ha ka thaiñ Shatei Lam Mihngi, u AK Mishra.
Ka kynhun ULFA ba la ïalam da u Rajkhowa ka la sdang ban ïakren ïasuk khlem buh kyndon bad ka Sorkar India ha u snem 2011 watla ka kynhun jong u Paresh Baruah k la pyrshah jur. La ngeit ba u Paresh Baruah u shong u sah ha khappud China-Myanmar.
La seng ïa ka ULFA ha u snem 1979 ha kaba ka la dawa ba dei ban ai noh ïa ka Assam da ka ri lajong. Kane ka kynhun kieng atiar ka la donkti ha kiba bun ki kam pyntriem bad ka la shah ñiew be-aiñ ha ka Sorkar India ha u snem 1990.
Hynrei ha ka 3 tarik Nailur, 2011, ka kynhun ULFA ba la ïalam da u Rajkhowa ka la sdang ban ïakren ïasuk bad ka Sorkar India hadien ba la ïasoi ïa ka soskular Suspension of Operations (SoO) hapdeng ka ULFA, Sorkar India bad Sorkar Assam.
