Shillong, Nohprah 28
U MLA barim na Nongkrem uba la shah rem haba u ïakhun kum u kyrtong ka UDP bad uba dang long kum u MDC mynta, u Bah Lambor Malngiang u la pynpaw ba lada ka UDP ka shim ïa ka rai ban ai ka jingpynshitom ïa u tang namar ba u leit ban kyrshan ïa ka seng NPP kaba la ïalam ïa ka Executive Committee ha KHADC un sa pyrkhat thymmai.
Haba ïakren bad u Bah Lambor Malngiang u la ïathuh haba u la ïohi ba ki MDC ka UDP ki la phah da ka jingthoh sha u President ka UDP u Bah Metbah Lyngdoh um kwah ban ong eiei hynrei u la pynpaw pat ba lada ka UDP ka pynshitom ïa u, ma u ruh un hap ban pyrkhat thymmai.
Haba kylli biang balei u leit ai jingkyrshan ïa ka NPP, u Bah Lambor u la pynpaw ba kum u MDC ka UDP u shu leit ai jingkyrshan ïa ka EC hapoh ka jingïalam u Bah Pynïaid Syiem kum u CEM ym ban rung sha ka seng NPP.
Haba kylli balei u leit ban kyrshan ïa ka NPP ryngkat u Bah Bindo Lanong uba dei MDC shu sieh na ka UDP, u Bah Lambor u la pynpaw ba ka saiñ pyrthei kaba ïar palat um lah ban batai namar mynshwa u Bah Bindo u ju kynthoh haba u duh tiket na ka UDP hynrei mynta ki la ïatreilang ban kyrshan ïa ka EC ba la ïalam da ka NPP.
Haba u nongthoh khubor u la pyrshang ban kylli biang hynrei u Bah Lambor um kwah shuh ban jubab namar u kwah ban ap ïa ka rai jong ka UDP hadien ba ki MDC ka UDP ki la phah jingthoh sha u Bah Metbah.
Kum ban shu pynkynmaw u Bah Bindo u hap ban ïakhun ïa ka ilekshon MLA na Nongkrem kum u kyrtong shimet watla u dei u nongaibuit ka UDP namar ka UDP ka la ai tiket ïa u Bah Lambor.
La ïohi ruh ba ha ka jingïalang General Council ka UDP, ka khlem pyntip shuh ïa u Bah Bindo ban jied pynthymmai ïa ki nongkitkam kat haduh ba ka shuki ba u bat kum u nongaibuit u la shah pynduh.
U Bah Bindo ha kine ki sngi u la leit ban ai jingkyrshan ïa ka EC ka NPP namar u la pynpaw ba ka UDP kam kheiñ briew shuh ïa u.
