Shillong, Nohprah 28
Ar ngut ki nongtuh kiba la donkti ban tuh ïa ki ‘battery’ jong ki tower mobile ba don ha ka shnong Lalmati, ki la shah kem noh ha ki pulit jong ka Pillangkata Outpost.
Kine ar ngut ki la donkti ban tuh haduh 24 tylli ki ‘battery’ jong ki tower mobile. Ïa kine ar ngut la ïoh ban kem noh ha ka 26 tarik mynta u bnai bad kine ki dei kiba la tip kyrteng kum u Bipul Marak na ka shnong Umdem bad u Pewarson Marak na ka shnong Lalmati.
Hadien ba ki la shah kem bad phla ïa ka jaka ba la buh ïa ki ‘battery’, na ka liang jong ki pulit ka Pillangkata hapoh ka jingïalam u Nurul Islam kum in-charge, la leit ban khynra ïa kawei ka jaka kaba don ha Burnihat Amtola, Assam hynrei kim shym la lap shuh ïa ki ‘battery’ namar u trai kane ka jaka u la dep ban pynkynriah sha kawei pat ka jaka.
Shuh shuh ki pulit ki la ong ba ka jingthwet ïa une u briew uba la phet rieh ka dang bteng bad la pyntip ruh ba na ka liang jong ki, ki la ïoh ban kurup noh tang ïa kawei ka kali pick-up kaba don ïa u number AS01-NC-9804 ba la pyndonkam ban kit ïa ki ‘battery’. Ha kaba ïadei bad kane, ki pulit ki la dep ban register case bad ka jingtohkit mynta ka la ïaid shakhmat.
