Khliehriat, Nohprah 28
Ka Seiñraij Jowai ryngkat ka Seiñraij Cham Cham ha ka thong ban pynskhem ïa ka jinglong kyrpang ka jaidbynriew Hynñiewtrep Hynñiewskum ha ka 23 bad 24 tarik Nohprah ka la pynlong ïa ka Dorbar Niamtre ha madan bol Cham Cham.
Ha ka sngi nyngkong jong ka Dorbar Niamtre la plie ïa u maw sahnam ba la shna kyrpang ban pynsah jingkynmaw ïa ka Dorbar Niamtre kaba 18 ka Ri 12 Doloi-Laiphew Syiem ha shnong Cham Cham da u Bah O.H Toi President Seiñraij Jowai ha ka jingsakhi lang ki ’riew rangbah ka Seiñraij Cham Cham bad ki samla ba mihkhmat na ki shnong ki raij bapher bapher.
Ha ka por janmiet pat ka la don ka prokram kyrpang jong ki khun samla ba la pynïaid da ka Khynroo Khyllood Comittee jong ka Seiñraij Jowai.
Ha ka sngi ba bud, ki khun ka Niamtre na kylleng ki shnong ki raij ki la wan ban ïashim bynta ryngkat ki riam ki beit kiba iphuh-iphieng.
U Pator ka Raij Jowai u Bah Raymond Nartiang kum u shongknor u la ai ki kyntien lamkhmat ha kaba ïadei bad ka thong ka jingpynlong ïa ka Dorbar Niamtre ha kylleng ki Shnong ki raij, katba u Bah Soimon Phawa kum uwei na ki ’riew rangbah ka Seiñraij Cham Cham u la ai ka nguh ka dem.
Ïa ka lama la pynher da ka Kong Mili Dkhar kawei na ki longkmie kaba la heh rta na ka shnong Cham Cham, ïa ki kyntien pdiang burom la pashat da u Bah Stop Phawa Secretary Seiñraij Cham Cham katba u Bah Nit Dkhar kum uwei na ki ’riew rangbah ka shnong Cham Cham u la ïathuh ïa ka khana lyngkot shaphang ka shnong Cham Cham.
Ha kane ka Dorbar Niamtre, ki mat ki phang ba la kren ki long, “Ka kamram ki khun ka Niamtre bad ka lawei” ba la kren da u Bah Harwis Phawa President Seinraij Tuber, “Ka Jaidbynriew ba la pynkyrpang ha ryngkat bad ka Niam” ba la kren da u Bah Kynpham Sing Nongkynrih Seng Khasi Kmie Ṁawkhar bad ka “Ka Niamtre ka Niam Tipbriew Tipblei” ba la kren da u Dolloi ka Elaka Jowai u Bah Puramon Kynjin.
La pynshongshit ïa ka Dorbar Niamtre da ki jingshad jingrwai ba la pynkhreh da ki khun samla jong ki Seiñraij bapher bapher.
Ha kane ka sngi la pyllait paidbah ruh ïa ka Almanak 2024 jong ka Khynroo Khyllood Committee da u Bah O.H Toi, President Seiñraij Jowai.
Shwa ban pynkut ïa ka Dorbar Niamtre, la ïoh ka jingkren lyngkot na ka Khlung Dkhar, Secretary Seiñ Kynthai Seiñraij Tuber katba u Bah Dimit Dkhar kum uwei na ki Kñi ba la heh rta na ka shnong Cham Cham kum ka dak ban pynkut ïa kane ka Dorbar Niamtre u la pynhiar ïa ka lama.
