Shillong, Nohprah 28
Ka jingshalan ïa u dewïong ba la tih kan dang bteng namarba u dewïong ba la dep tih u dang don sa kumba 5 lak Metric Ton tam bad u dewïong ba shu kurup u don kumba 2 lak Metric Ton.
Ka tyllong khubor ka ïathuh ba u dewïong ba la dep tih u don sa kumba 5 lak MT namar bym pat lah ban pyndep ban lilam hapoh jong une u Nohprah 2023 kumba la buh por.
“Ngi la pyrshang ban pyndep lut ban lilam ïa u dewïong ba la dep tih hynrei namarba u don u dewïong ba khlem pat pynïaid da kito kiba ïoh ban shalan ïa u dewïong,” la ong ka tyllong khubor.
La ong ba ki don kiba la ïoh ban shalan ïa u dewïong hynrei namarba kim pat lah ban pynïaid la kut ka por ba sahteng noh ka jingshalan.
Kumta ïa u dewïong ba dang dei ban lilam hap ban leh thymmai biang bad hap ban buh biang ha ka rynsan jong ka Coal India Limited na ka bynta ban khot ïa kiba kwah ban shimbynta ban shalan ïa u dewïong.
La ong ba ka Challan kaba dei ban pyllait ïa u dewïong ka la ïaid shakhmat haba ïadei bad u dewïong ba shah kurup nalor u dewïong ba dang sahteng ban lilam.
Namar ka jingdon u dewïong ba dei ban shalan, ki trok ban shalan ïa u dewïong kin dang ïaid ha kine ki bnai.
Shuh shuh la ong ba ynda la dep ban shalan lut ïa u dewïong ba la dep, kan nym don shuh ka jingshalan dewïong thymmai tat haduh ban sdang ka jingtih dewïong katkum ka jingstad mynta.
