Shillong, Nohprah 28
Kawei ka trok pick up kit piat ka la leit tynrah ïa u païa bad kynroh jong u Bah Hamletson Dohling bad kylla lyndang bad ban ruh ïa ka kynroh jong Bah West Nongrum ha Lummawbah kaba la wanrah ruh ka jingjulor ïa ka kali kaba pynïeng ha phyllaw ïing. Kane ka jingjia ka la jia ha ka step jong ka 27 tarik Nohprah 2023 ha ka por 4 baje eiei.
Kane ka trok pick up kaba don ïa u registration number AS 02 DC 0343 ka dei kaba wan na Assam bad kaba thmu ban pynpoi ïa u piat sha Nongskhen ban shalan sha ki shnong khappud bad sha Bangladesh.
Katei ka trok pick up kit piat kaba la wan na Assam ka la wan ïaid na surok Lummawbah bad ynda la poi ha ka bynta ba long thieb ha Block 4, kane ka kali kam lah shuh ban kiew bad u nongñiah um lah teh lakam shuh ha kaba ka la syntuid shadien bad leit tur ïa kitei ar tylli ki kynroh.
La ïathuh ba nyngkong ka la leit dei shuwa ha u païa bad kynroh jong u Bah Hamlet, hynrei namar ba la shna skhem bha, ka la kylla lyndang bad ban ïa ka kynroh jong u Bah West kaba don mar shiliang surok.
Na ka liang u nongñiah bad nongbud ki la phet krad noh ïalade da kaba ieh ïa kumba 60 byrni tam eiei u piat kiba la hap sha madan ba la kit ha kane ka trok pick up.
Ïa kane ka trok la wan ban tan noh da ki pulit katba ïa u piat la wan ban shimti noh da ka trai kaba la pynkit noh da kawei pat ka trok pick up.
