Shillong, Nohprah 28
U Myntri Rangbah ka Jylla Conrad K Sangma ha ka Sngi Palei u la ong ba ka sorkar jylla kam don jingthmu satia ban thied helicopter khamtam lei haba peit ïa ka jinglong jingman ka pla tyngka ka sorkar.
Kane ka jingkren jong u Myntri Rangbah ka long hadien ka jingmih ha kawei na ki kot khubor (ym ha u Nongsaiñ Hima) ba ka Sorkar Jylla ka la pynkhreh shaid shaid ban thied ïa ka helicopter na ka bynta ban shakri ïa ki heh ki haiñ (VIP).
Ha ka kyrwoh ba u la pyllait, u Myntri Rangbah u la ong ba kam don satia kata ka jingpyllait ‘tender’ ba kum kane ka jingthmu namar ka jingrem dor ban thied kat ïa ka helicopter nalor ka jinghap pynlut bad sumar ïa ka.
Katkum ka jingong ka jong u, ka Sorkar ka ju pyllait ïa ka ‘tender’ tang ban shu shim wai ïa ka helicopter kata ruh ka shong ha ka jingpyndonkam ïa ka bad siew ruh katkum ka jingïaid ka kynta (hour basis). Kane ka dei kaba biang eh ban lait na ka jingpynlut kaba bun.
U Conrad u la ong, “Ngi la leh ïa kane namar ha kiba bun ki por, ka helicopter kaba don hangto ka dei ruh na ka bynta ki nongjngohkai bad ruh na ka bynta ki ’riew paidbah kiba leit donkam sha Shillong, Tura bad Guwahati, bad kumta barabor ki ju shah ktah haba don pat ka leit jingleit jong ki heh ki haiñ, kumta la leh ïa kane ban shim wai bad pyndonkam ha kano-kano ka por kaba ngi donkam. Kane ka helicopter ka dei jong ki nongpynïaid, ki pilot ruh ki dei jong ki, ka umphniang ruh ka jong ki, ngi shu siew tang ka pisa kiba long katkum ki kynta.”
“Kumta kam long satia kaba lah na ka bynta jong ngi ban thied ïa ka helicopter naba ka long kaba rem dor, ka long ruh kaba eh ban pynbit pynbiang bad nalor kane, ngi donkam ruh ki pilot kiba ka sorkar kan hap ban thung, kumta halor kine ki jingeh, kam don satia kano kano ka jingthmu ban thied naba wat ka leit ka wan ki heh ki haiñ ruh ka long kaba duna hynrei ha kajuh ka por, nga sngew ruh ba ki helicopter ki long kiba donkam namar ki khate bun ka por bad teng teng haba don ki kam kyrkieh ba hap pyndep da ki nongïalam ba la rangbah bad na ka bynta kane, ngi donkam ïa ki helicopter hynrei ka jingpyndonkam pat ka long kaba duna bha,” la ong u Conrad.
U la ong, “Kane kam dei ka sien ba nyngkong ba kane ka kot khubor ka la thoh bad pynmih ïa ka khubor kaba khlem jingshisha hynrei ban thoh bakla, bad dang shen ruh ka la pynmih ka khubor ba don ka jyrsieh ba T.1300 klur hapoh ka tnat jngoh kai pyrthei hynrei hadien la shem ba dei tang T.13 klur bad kam don hi ruh ka jyrsieh.”
U Conrad u la kyntu ïa kane ka kot khubor ba kam dei ban pynmih ïa kum kine ki khubor tang ban shu pynthohbria ïa ka Sorkar, kaba dei ka kam ka bym dei.
Haba kylli, u Conrad u la ong ba u ieh ha ka tnat DIPR bad ka tnat ba dei ban khmih la ka donkam ne em ban ujor pyrshah ïa kane ka kot khubor da ka mukotduma bai mynraiñ khmat.
