Shillong, Nohprah 29
Ka shnong Nongjrong kaba hap ha Mawkynrew konstitwensi kan sa pynïasoh noh bad ka Rilum Jaiñtia lyngba ka surok kaba la ïaid ka jingshna mynta ha kaba yn sa tei ruh ïa ka jingkieng kaba jrong ha Wah Umngot kaba la mang kumba T.25 klur.
Ha ka jingshisha, la dep buh mawnongrim ban shna ïa ka jingkieng na shiliang sha shiliang ka Wah Umngot ha shnong Nongjrong da u Symbud Myntri Rangbah u Bah Prestone Tynsong ha u Jymmang jong u snem 2021.
Ka jingshna ïa ka surok ka la ïaid bad ka jingshna ïa ka jingkieng ka dang sahteng namarba donkam ban tei da ka jingkieng kaba kham heh ha kaba la mang thymmai biang ïa ka pisa kaba la kot sha ka T.25 klur.
La ïathuh ba kane ka surok ka long kum ka inter-district road ka ban pynïasoh ïa ka East Khasi Hills district lyngba ka shnong Nongjrong bad kan mih sha Moodymmai ha West Jaiñtia Hills district.
Kane ka surok kan long ka jingmyntoi ïa ki briew ka thaiñ Mawkynrew haba leit sha Jaiñtia Hills district. La mang ïa kane surok bad jingkieng lyngba ka Meghalaya Integrated Transport Project (MITP).
Kumba ka long mynta, ka surok kali ban poi sha Nongjrong ka dei tang ka surok na Shillong sha Smit ter ter sha Kharang, Dienglieng shaduh Nongjrong.
Ka shnong Nongjrong kaba la pawnam kum kawei na ki jaka jngohkai ka don marjan bad ka West Jaiñtia Hills district bad ka Wah Umngot ka tuid narud jong ka shnong Nongjrong.
