New Delhi, Nohprah 29
Ka Sorkar India, Sorkar Assam bad ka United Liberation Front of Assam ki la ïasoi ïa ka soskular Memorandum of Settlement ha ka Sngi Thohdieng ha nongbah New Delhi.
Kane ka long ka sngi ban sah kynmaw namar ka jingïasoi soskular ka la wan hadien 12 snem tam naduh ba ka ULFA, hapoh ka jingïalam jong u Arabinda Rajkhowa, ka la wan shakhmat ban ïakren ïasuk bad ka sorkar. Hynrei ka kynhun jong ka ULFA ba la ïalam da u Paresh Baruah kam ïadon bynta satia bad kane ka soskular ba la ïasoi mynta ka sngi namar ka ïai pyrshah ban ïakren ïasuk.
Ha kane ka sngi ba la ïasoi ïa ka soskular, nalor ki nongmihkhmat na ka ULFA, la don lang u Myntri Korbar Ri, u Amit Shah, u Myntri Rangbah ka Assam, u Himanta Biswa Sarma bad ki heh na ka sorkar India bad sorkar Assam.
Haba ai jingkren, u Amit Shah u la ong ba kane ka sngi ka long ka ban sah kynmaw na ka bynta ka Assam kaba long kawei na ki jylla kaba la mad ïa ki kam ïaumsnam la bun snem. U la ong ba naduh ba u Narendra Modi u la ïalam ïa ka Sorkar Pdeng ha u snem 2014, la pyrshang ban pynïajan ïa ka Delhi bad ka thaiñ Shatei Lam Mihngi bad ka la sdang ka jingïakren bad ki kynhun bapher bapher.
Ha ki san snem ba la leit noh, u Amit Shah u la ong ba ka sorkar ka la ïasoi ïa 9 tylli ki soskular kiba ïadei bad ka jingwanrah ïa ka jingsuk bad ka jingpynbeit ïa u pud u sam ha ka thaiñ Shatei Lam Mihngi, bad lyngba kine ki soskular, la lah ban wanrah biang ïa ka jingsuk ha kiba bun ki bynta jong ka thaiñ.
Shuh shuh u la ong ba haduh mynta, palat 9,000 ngut ki dkhot ka ULFA ki la dep ban pyndem wait bad ïa ka aiñ Armed Forces Special Powers Act la dep ban weng na 85 per cent ki jaka ha Assam. U la ong ba kane ka soskular kan pynkut noh syndon ïa ki kynhun kieng atiar kiba treikam ha Assam.
Shuh shuh u la ong ba lyngba kane ka soskular, ki nongmihkhmat ka ULFA ki la mynjur ban kyntait noh ïa ka lynti jong ka jingïaumsnam, ban pyndem noh ïa ki tiar siat bad ban pynduh noh ïa ka kynhun kieng atiar jong ka ULFA. La mynjur ruh ba ki dkhot ka ULFA kin mih noh na baroh ki ktem, ban ïadon bynta ha ki kam synshar paidbah da ka jingsuk bad ban pynneh pynsah ïa ka jinglong kawei jong ka Ri.
Nalorkata, u la ong ba naduh ba ka ULFA ka la sdang ïa ki kam ïaumsnam, kumba 10,000 ngut ki briew, la ki dei ki bor pahara, dkhot ULFA ki la ïap. U la ong ba ka sorkar India ka la mynjur ban ai da ka song jingïarap kaba heh bad kumjuh ruh ki projek kiba bun jait ban kyntiew ïa ka Assam.
U Myntri Korbar Ri u la ong ba ka sorkar u Modi kan pyndep lut ïa baroh ki kyndon ba la don ha ka soskular.
Ha kajuh ka por, u la ïathuh ba naduh ba ka sorkar u Modi ka la wan ha ka bor ha u snem 2014, ki kam pyntriem ha Assam ki la hiar da 87%, ka jingïap briew da 90% bad jingrahbor da 84%.
U Amit Shah u la ong ba ka tnat Korbar Ri kan pyntreikam ïa ki jingdawa jong ka ULFA da kaba buh ruh da ka por, bad yn thaw ïa ka Committee ka ban peitngor.
