Shillong, Nohprah 29
Ka Hynñiewtrep National Liberation Council (HNLC) ka la byrngem ïa u MLA ka Sohra, Bah Gavin M. Mylliem ban shim ka jingkitkhlieh bad ieh noh kam kum u MLA lada ka Sorkar ka khang khyrdep ïa ka Mawmluh-Cherra Cements Ltd (MCCL).
Kane jingbyrngem na ka seng ka la wan hadien ba ka Sorkar Jylla ka la thmu ban khang khyrdep noh ïa katei ka karkhana pynmih dewbilat kaba la slem hapoh ka Jylla.
“Lada ka Sorkar ka ïaid shakhmat ha ka ban khang khyrdep ïa ka MCCL, kan long kaba biang eh ïa u MLA ka Sohra, Bah Gavin ban shim ka jingkitkhlieh. Ha ka jingshisha u la dei ban ieh noh kam na ka kyrdan kum u MLA. Lada u kyntait, ka HNLC ka ong ba un hap shim ka jingkitkhlieh,” la ong ka kyrwoh na u General Secretary-cum-Publicity Secretary ka HNLC, Bah Saiñkupar Nongtraw. Ka seng ka kdew ruh ba kumba utei u nongmihkhmat bad ka Sorkar jong u ki nud ban tep im ïa ka MCCL, kumta ka byrngem ba u dei ban shim ka jingkitkhlieh (da ki kam jong ngi).
“Ki nongshet kylla jong ki paidbah ki dei ban shah pynshitom da ka jingïap,” ong utei u nongïalam.
