Jowai, Nohprah:
U MP ka Shillong Parliamentary Konstitwensi Bah Vincent H Pala ha ka 27 tarik Nohprah u la plie paidbah ïa ka basa die doh ha ka ïew Iawmuksow Mowkaiaw, kaba la tei ha ka jinglut kaba T.9.60 lak.
Na kane ka T.9.60 lak, ïa kane ka basa die doh T.7 lak la synñiang da u MP Shillong lyngba ka Members of Parliament Local Area Development Scheme (MPLADS) bad T.2.60 lak pat la pynlut na ka dorbar Iawmuksow Mowkaiaw.
Kane ka ïew ka dei kaba la sdang naduh u snem 1957 bad ka dei kawei na ki ïew kaba rim ha rilum Jaiñtia. Ka don haduh 370 tylli ki basa die mar bam, die jaiñ sopti, basa die ïa ki tiar pyndonkam ha ïing bad kiwei pat ki tiar ki mar ba bunjait.
U Bah Vincent H Pala haba kren u la kyntu ïa ki nongdie nongthied ban pynneh ïa ka jingkhuid ki basa die doh kumjuh ka ïew hi baroh kawei, khnang ban hun mynsiem ki paidbah haba bam ïa ki mar bam kumjuh ki doh ba thied na kane ka ïew.
Haba ïaroh ïa ki bor pynïaid kane ka ïew, u Bah Vincent u la ong, ha ka jingïaid lynti jong u kylleng kylleng u ïohi ba ki briew ynda da ïoh pisa ïoh skhim ki tur ban ïaknieh, hynrei ha kane ka ïew pat u ïohi ïa ka jingpher ka rukom pynïaid, kata nalor ba ki lah ban pynïaid ha ka rukom ba long khuid long shai, kane ka ïew ka la don bynta ruh ban synñiang ai jingïarap kylleng wat sha ki skul, ki balang bad kiwei ba donkam jingïarap.
U MP u kyrmen ba kin dang bteng shuh shuh ïa ki kam ba bha, khnang ba kum ki nongmihkhmat ruh kin suk ban synñiang ha kano kano ka kam pynroi.
Ha kane ka sngi nalor u MP la ïadonlang u MDC ka thaiñ u Bah Winning G Sungoh, u BDO ka Laskeiñ Block u Bah B Niang, ki dkhot ka dorbar Iawmuksow Mowkaiaw, kiba shah khot sngewbha bad kiwei.
Ha ka jingïalang ba pynïaid da u Chairman ka Iawmuksow Mowkaiaw u Bah P Shadap, u Secretary u Bah Pynbiangmi Laloo u la ïathuh ïa ka khana lyngkot shaphang ka ïew, bad la ïoh ruh ka jingkren na u waheh shnong Mowkaiaw u Bah Shaniah Lamare.
