Shillong, Nohprah 29
U MLA bad MDC ba mynta na ka seng Congress uba mihkhmat na Nongstoiñ konstitwensi u Bah Gabriel Wahlang u la pynpaw ban nym treh shuh ban ïakhun ïa ka ilekshon MDC ka ban long lashem snem.
Haba ïakren bad u Bah Gabriel Wahlang u la ïathuh ba haduh mynta ym pat don ki nongkitkam ba kin mih shakhmat ban pynpaw ba ki kwah ban ïakhun ïa ka ilekshon MDC.
U Bah Gabriel u la ong lada ym don ba pan tiket ïa ka ilekshon MDC na Nongstoiñ konstitwensi u hap ban shong pyrkhat.
U la pynpaw ba hadien ba ki paidbah ka Nongstoiñ konstitwensi ki la jied ïa u kum u MLA um kwah shuh ban ïakhun ïa ka ilekshon MDC namar u kwah ban ailad ïa kiwei kiba kwah ban ïakhun.
Kum ban shu pynkynmaw, u Bah Gabriel Wahlang u la jop ïa ka ilekshon MDC na ka seng Congress ha u snem 2019 na Nongstoiñ konstitwensi. Da ka jingïaineh ha ka seng Congress ki paidbah ki la jied ïa u kum u MLA ha ka ilekshon ha u snem 2023 da kaba pynliem ïa u MLA barim uba dei u kyrtong ka NPP Bah Macmillan Byrsat.
