Jowai, Nohprah:
Ka Seiñraij Ïalong ryngkat bad ka tnat Jngoh Kai Pyrthei da ka jingkyrshan ka tnat Arts and Culture ka sorkar jylla ha ka 28 tarik Nohprah ki la sdang ïa ka tamasa kaba tip kum ka Jaiñtia Hills Winter Festival halor ka phang Harmony Across Borders. Kane ka tamasa kan kut ha ka 29 tarik Nohprah.
Ïa kane ka tamasa la pynlong ha Madan Lyngkieñ, Ïalong kaba don harud ka Wah Myntdu ha kaba ka MLA ka Sutnga Saipung, ka Kong Santamary Shylla ka la long kum ka kongsan ha ka jingïalang kaba la pynïaid da u Bah Ivan Suting ha ka jingdonlang ka sahep ka tnat Tourism ba dei peit ïa ka West bad East Jaiñtia Hills, ka Kong SD Shylla.
Ka Kong SD Shylla ka la ong kane ka tamasa ka dei kaba nyngkong eh ha rilum Jaiñtia bad ka dei ruh ka rynsan ban pyni ïa ka sap ka phong bad ki jingbam tynrai jong ki Pnar. Ka la ïathuh ba ha u snem ba la leit la don 40 hajar ngut ki nongjngoh kai kiba wan shangkai sha Ïalong.
Ka Kong Santamary Shylla ha ka jingkren ka pynpaw ka jingkmen ba ki sahep ka tnat jngoh kai pyrthei ki trei shitom ban wanrah ïa ki kam ba bha ha baroh ki ar tylli ki district. Ka khmih lynti ruh ba kane ka tamasa Jaiñtia Winter Festival kan nang heh kat nang ïaid ki snem.
Kiwei de kiba la ai jingkren ki long u President ka Seiñraij Ïalong, Bah P Shylla, Secretary ka Seiñraij Ïalong, Bah J Pale.
La pynphuh pynphieng ïa ka jingïalang da ki jingrwai jingshad ba la shim bynta da ki Seiñraij bapher bapher na West Jaiñtia Hills kum ka Shad Pastieh, shad Pliang, shad nongrep, shad sukra bad kiwei kiwei ki jingshad tynrai.
Nalorkata la don ruh ki kynhun tem na kylleng ka jylla ki ban pynbyrngia ïa ki paidbah.
Ha ka 29 tarik kan don ruh ka Fashion Show na u Daniel Syiem bad yn don ruh ki dukan die syntiew, ki jait jingbam jingdih tynrai, ki tiar ba la shna na ka shnong Lyrnai bad kiwei kiwei.
Nalorkata la buh ruh ïa ki jaka ba dawa ka juk mynta kum ka Photo booth, ka jaka ringdur 360 moments bad kiwei ki jaka shondur.
