Shillong, Nohprah:
Ka Director of Health Services (DHS) barim ka jylla, ka Dr Rita Tariang, ka la pynïasoh sha ka seng BJP ha Meghalaya ha ka Sngi Balang.
La pdiang ïa ka Dr Rita da u President ka BJP, u Rikman G Momin, ha ka jingïadonlang ki Vice President ka seng, u Bah Khrawboklang Basaïawmoit, Gagan Jain bad u Bah Wankitbok Pohshna, u General Secretary, Bah Everist Myrsing, bad ka Secretary ka seng, ka Dr. Bernadette Lyngdoh.
Na ka liang u Rikman, haba ai jingkren, u la ong ba ka Dr Rita ka la don ka jingnang jingtip kaba bun ha ki kam kiba ïadei bad ka sorkar bad ka la noh synñiang ruh ban pynbha ïa ki lad ai jingsumar. U la ong ba ka jingwan pynïasoh jong ka DHS barim sha ka seng kan ïarap ïa ka BJP ha kiba bun ki liang.
Haba kynthoh halor ka jingpynïasoh sha ka BJP, ka Dr Rita ka la ong, “Nga la sngewthuh ba ka BJP ka la ïai trei ban ïarap ïa ki duk ki suk, bad ïa kane la ïohi na ka jingwanrah ka sorkar u Narendra Modi ïa ki skhim kiba ïadei bad ka koit ka khiah. Ka BJP ka ai ïa nga ïa kata ka rynsan ba ngan ïai trei na ka bynta ki nongshong shnong ka jylla wat hadien ba nga la shongthait na ka kam sorkar.”
