Shillong, Nohprah 29
Ka Hynñiewtrep National Liberation Council (HNLC) ka la tyrwa ïa ka jingsiew kaba T.25,000 shi bnai sha ki nongtrei ka Mawmluh-Cherra Cements Ltd (MCCL) lada ki pynïasoh sha ka seng hadien ka jingthmu ka Sorkar ban khang khyrdep noh ïa kane ka karkhana pynmih dewbilat.
“Ka jingbyrngem jong ka Sorkar Jylla ban khang khyrdep noh shi syndon ïa ka MCCL ka dei tang ka kam saiñ pyrthei. Ka HNLC ka pynrem jur ïa kane ka jingthmu ka Sorkar naba ka thong jong ka (Sorkar), ka long ban ieh khlem kam khlem jam ïa ki nongshong shnong ka Sohra bad ban pynbor ïa ki ban kohnguh ïa ki ajenda jong ki khwan myntoi shimet,” la ong u General Secretary-cum-Publicity Secretary ka HNLC, Bah Saiñkupar Nongtraw ha ka kyrwoh khubor.
Ka seng ka la ong ba ha ka jaka ban buh hakhmat ïa ka mat ban pynbha ïa katei ka karkhana, ka Sorkar ka thmu ban khang khyrdep ïa ka MCCL bad kyntiew pynban ïa ka roi ka par jong ki karkhana pynmih dewbilat ba long trai da ki bar Jylla na kiwei pat ki Jylla.
U Bah Nongtraw u la pynpaw ruh ka jingsngewsih ba katei ka jingthmu ka Sorkar ka pyntroiñ ïa ki jingsngew jong ki jaidbynriew ‘riewlum.
“Kane ka pynartatien halor ka jinglah ka Sorkar ban pynïaid ïa ka Jylla baroh kawei lada kim lah ban tehlakam tang ïa ki kam ba ïadei bad kane ka karkhana kaba la slem bah. Ka la paw shai ba ka Meghalaya ka wan ha ka kyrdan ba ar haba phai sha ki Jylla kiba duk tam ha India, ha ryngkat ka ‘per capita income’ kaba ar na kiba duna tam hapoh ka ri,” u la ong.
Utei u nongïalam u la ong ruh ba shen, kan sa don ka jingïakhun kaba jur hapdeng ki trai-ri bad ki bym dei trai-ri na bynta ka jaka-puta bad ki kam ki jam hapoh ka Jylla.
“Ki samla kin sa lynga-pisa, ha kawei ka liang ka ban ïalam sha ka jingïaleh pyrshah ïa ka Sorkar ha kano-kano ka rukom lada donkam. Kane ka jingïaleh kan ym mih na ki briew kiba duh noh ïa ka jingangnud na bynta ka jinglaitluid, hynrei na ka jingshisha ba kim don bam ban bam,” u la ong.
Katkum ka jingsngew u General Secretary, kumba ka long mynta, ka seng kam ïohi da kiwei pat ki lad ki lynti bad kumta ka kwah ban kner ïa ka jingtyrwa sha ki nongtrei jong katei ka karkhana bad lada ki long kiba kloi ban ïasoh bad ka daw jong ka seng, kata kan pynbiang sha ki ïa ka jingsiew kaba T.25,000 shi bnai.
Shuh shuh u la bynrap ba ki briew kiba biang na bynta katei ka kam ki dei ban long hapoh 45 snem ka rta bad ban ïadon bynta ha ka jingshah hikai.
“Lada ki pyni ïa ka jingminot bad noh sha ka daw bad ka nongrim jong ngi, ngin pyrkhat ban tyrwa sha ki ïa ka jingsiew kaba kham heh. Khatduh, ka Sorkar ka dei ban sangeh ka kren jali-jaum bad pynlut kai ïa ka por, kumjuh ban kiar na kaba tap ne buhrieh ïa ka jingshisha lym kumta,” pynkut ka kyrwoh na u Bah Nongtraw.
