Aizawl, Nohprah 29 (UNI)
Kumba 83 ngut ki shipai Myanmar ki la rung sha Mizoram ha ka shnong Tuisentlang kaba hap ha Lawngtlai District ha ka Sngi Thohdieng da ka jingthmu ban wan pyndem hakhmat ki shipai Assam Rifles ha ka shnong Para kaba don marjan, la ong uwei u heh pulit ka Mizoram.
Utei u heh pulit u la ong ba kitei ki shipai Myanmar, ïa kiba la ju tip ruh kum ki ‘Tatmadaw’, ki la rung sha Mizoram ryngkat bad ki tiar siat hadien ba ki la phet noh na ka ktem jong ki kaba don sha shiliang khappud.
Hadien ba ki pulit ki la pynlong ïa ka jingtohkit, la ong ba ka ktem jong ki shipai Myanmar kaba don hajan Parva ka la shah knieh ha ka Sngi Palei ha ki dkhot ka Myanmar People’s Army ïa kaba la ju tip ruh kum ka People’s Defence Force (PDF) lane Chin Defence Force (CDF), bad ha ki dkhot ka Chin National Army (CNA).
La khmih lynti ba nalor kitei ki 83 ngut, kin lah ban nang don shuh ki shipai Myanmar ki ban wan phet sha Mizoram.
Na ka liang ki pulit ka Lawngtlai District ki la dep ban ai jingtip sha ki heh ka Assam Rifles kiba don ha Parva bad ki shipai Assam Rifles ki la sdang ban shim ïa ki sienjam ban pynphai noh ïa kitei ki shipai Myanmar sha la ka jong ka Ri. Ïa kitei ki 83 ngut ki shipai Myanmar la wanlam sha Parva. Da ka jingwan jong kitei ki 83 ngut, ka jingdon ki shipai Myanmar kiba la rung sha Mizoram naduh ka 13 tarik Naiwieng ka la kot sha ka 187 ngut.
Kawei ka ktem hadien kawei pat jong ki shipai Myanmar ki la shah knieh ha ki lehnoh kiba don ha Chin State naduh u snem 2022 hadien ba ka National Unity Government of Myanmar in Exile ka la kyntu ban weng noh ïa ka jingsynshar jong ki shipai naduh ka 1 tarik Rymphang, 2021. Ki pulit ki la ong ba ïa kitei ki 83 ngut ki shipai Myanmar yn kit da ka liengsuiñ na Parva sha Moreh ha Manipur kumba la leh ha ki khep kiba la dep khnang ban aiti ïa ki sha ki bor jong ka sorkar Myanmar.
