Shillong, Nohprah 29
Wat la ka sorkar jylla ba la ïalam da ka seng NPP kam pat pyntikna ïa ka ilekshon MDC sha ka KHADC kaba dei ban long lashem snem hynrei ki kyrtong ha ki konstitwensi bapher bapher kiba don ha ka seng NPP ki la nang pynkhreh shaid shaid ïa ka ilekshon.
Haba phai sha ka Mawkhar-Pynthorumkhrah konstitwensi la ïoh jingtip ba haduh mynta ki nongkitkam jong u Bah Ransom Sutnga uba dei u kyrtong ka NPP na North Shillong konstitwensi kim pat don kiba nud ban mih shakhmat ban pan tiket na ka seng NPP ban ïakhun ïa ka ilekshon MDC. Pynban haduh mynta kiba la pynpaw ba kwah ban ïakhun ïa ka tiket MDC ki long tang u Bah Rocky Hek uba dei u kyrtong ka NPP na Pynthorumkhrah konstitwensi ha ka ilekshon MLA ba la dep bad shah rem noh ha u kñi lajong u Bah A.L Hek. Ki khubor kiba ïajan bad ki nongkitkam ka NPP ha North Shillong ki la ïathuh ba naduh ba ki kyrtong ka NPP ki liem lut ha Khasi Hills kiba bun ki nongkitkam ki la kynrandien ban pan tiket NPP namar ki tieng ïoh kim poi sha ka thong.
Haba phai pat sha Jaïaw konstitwensi kaba ka North Shillong konstitwensi ka hap lang ha kane ka ilekshon MDC ki la aiti beit ha u Bah M. Rapsang u MLA barim ka West Shillong konstitwensi uba dei u kyrtong ka NPP ha ka ilekshon MLA ba un pynïeng ïa u kyrtong uba biang.
Ki khubor ki ïathuh ba u Bah Rapsang u la ïoh ban sei da u kyrtong uba dei u nongkitkam ka NPP bad kumjuh u nongïalam barim ka KSU. Ha Jaïaw konstitwensi la sngewthuh kiba ïakhun ïa ka ilekshon MDC kiba la paw kyrteng haduh mynta kin dei ki nongïalam barim na ka KSU kata ka UDP kan sei ïa u Bah Auguster Jyrwa uba dei General Secretary barim ka KSU.
