Nongstoiñ, Nohprah 29
Watla ka jingthwet bad jingbuddien jong ki pulit ïa ki runar kiba donkti ban shoh bad lute ïa ki nonghikai ka dang ïaid bteng haduh mynta, hynrei ka tyllong khubor na ki heh pulit ka distrik ka ïathuh ba haduh mynta ym pat shym la ïoh kem ïano-ïano ruh.
Kumban shu pynkynmaw ba ha ka janmiet jong ka 11 tarik u Nohprah, 2023, 2 ngut ki nonghikai jong ka Rangsapara Secondary School ki la shah shoh dusmon ha ki runar ki bym tip satia ki dei kiei ha kawei na ki jaka ha ka shnong Mynniar, West Khasi Hills.
Kitei 2 ngut ki nonghikai kiba la shah shoh dusmon ki dei kiba la tip kyrteng kum u S. Chetri (49 snem ka rta) bad u T.R. Sangma (48 snem ka rta). Katei ka la jia katba ki dang wan na Nongstoiñ da ka thuk-thuk da ka jingthmu ban leit sha Rangsapara hynrei ynda ki la poi ha Mynniar ki runar ki la pynsangeh ïa ka thuk-thuk jong ki bad tied naphang ïa kitei ki nonghikai.
La ong ruh ba ha katei ka jingjia baroh 2 ngut ki la mynsaw jur bad ïa u S. Chetri la pynkit noh mar-mar sha Civil Hospital Nongstoiñ ban ïoh ïa ka jingsumar ba kyrkieh katba u T.R. Sangma u la khlad noh na ka jingjur palat ka jingmynsaw.
Shuh shuh halor katei ka jingjia, na ka liang ki pulit ka West Khasi Hills ryngkat ka kynhun tohkit na nongbah Shillong ba kynthup ïa ki pulit ka ‘Crime Scene Unit’, lem bad ka ‘K-9 Unit Dog Squad’ ki la dep ban hiar sha ka shnong Mynniar ban pynlong ka jingbuddien bad tohkit shuh-shuh halor ka jingjia hynrei haduh mynta ym pat shym la lap satia. Na ka liang ki heh pulit ka distrik, ki la ong ba haduh mynta ka jingthwet ïa kitei ki runar kan dang ïaid shakhmat.
