Nongpoh, K’Lyngkot 02
Ha kawei ka jingjia takhuh kali ha ka Lah Sngi U Blei ha Shangbangla, Ri Bhoi District, kawei ka trok kit dewbilat kaba la wan na ki thaiñ Shillong ban hiar sha ka nongbah Guwahati ka la leit ban rat ïa u ‘divider’ jong ka surok bah National Highway 6 bad jam sha shiliang jong ka surok bad ban leit tynrah pat ïa kawei ka trok kaba dang kiew sha ka nongbah Shillong tad haduh ba katei ka trok kaba shah tynrah ka la kylla lyndang hapdeng jong ka surok bah.
Katkum ka jingtip ba la ïoh lum na ki bor pulit, la ïathuh ba katei ka la jia ha ka por kumba 6 baje janmiet namar ka jingpynher sted bad ñiah khlem-akor jong u nongñiah ka trok kit dewbilat kaba don ïa u nombor AS01 JC3752 kaba la pynlong ïa u nongñiah jong katei kawei pat ka trok kaba shah tynrah, kaba don ïa u nombor AS01 PC2015 ba un mynsaw jur.
Na ka liang ki pulit ki la pynkit noh mar-mar ïa utei u nongñiah uba la mynsaw jur sha Nongpoh Civil Hospital na ka bynta ban ïoh ïa ka jingsumar kaba kyrkieh. La ïoh jingtip ruh ba u nongñiah jong katei ka trok kit dewbilat, u la phet krad noh na katei ka jaka.
Shuh shuh, ki bor pulit ki la ïathuh ruh ba hadien katei ka jingjia, shiliang jong ka surok bah kaba kiew sha ka nongbah Shillong ka la ngat ha ka jingdheng kali kaba jur namar ka jingkylla jong katei ka trok kaba shah tynrah hapdeng surok, bad ki bor pulit ki la hap ban pynïaid noh ïa ki kali tang na kawei ka liang jong ka surok bah.
Halor kane ka jingjia, ki pulit ki dang pynlong ïa ka jingtohkit bad khamtam ban ïoh kem ïa u nongñiah jong katei ka trok kit dewbilat uba la phet krad.
