Jowai, K’lyngkot 02
Kumba ju long man la u snem ka jingpdiang burom ïa ka jingwan u snem thymmai ha sor Jowai ka long kaba shongshit bad shongkun bha na ka jingïashim bynta ki dorbar shnong bad ki kyntoit dong bapher bapher.
Mynta ka kynti ka shnong kaba ïashimbynta thymmai ka dei ka Panaliar.
Nalor ka Panaliar, ki shnong kiba ju ïashim bynta kiba kynthup ïa ka Khimusniang, Mynthong, Chutwakhu, Tympang Iawmusiang, Mission Compound, Tpep Pale, Lumpariat, Mookyrdup, Caroline Colony, Ladthadlaboh, Moosalyngkat, Dongmihsngi, Salaroh, Loomsooiung Newhill, Khliehiongriang bad ka Myntdu Pynthornein, ki la mih paidbah ban shad kynhoi risa ryngkat ka jingsawa ki sur jingrwai.
Hadien ba la dep ka jingbam khawai sngewbha kaba shisien shisnem ha man la ki shnong bad ki dong, ki nongshong shnong na ki dong ki shnong ki la ïamih paidbah ban leit shad kmen ha kylleng ki shnong ki dong ka sor Jowai hapdeng ki sur kiba pynum bad pynkyndeh ïa ka mynsiem jong ki nongshong shnong.
Hadien ka jingshad na kylleng ka sor Jowai ki dorbar shnong ki la wan ïuhkjat sa ha Ïawmusiang ban pyni hakhmat ki bor pynïaid ka Synjuk Waheh Shnong Jowai ha ryngkat ka District Tourism Officer, West Jaiñtia Hills ïa ki jingshad ryngkat ki jingrwai kiba kit jingmut bad ki rukom tem kiba pynshongshit ïa ka shnong ka thaw.
Na ka liang ki bor pynïaid ka Synjuk Waheh Shnong bad ka tnad Tourism ki la ai da ka memento ban sah kynmaw ïa ka jingïashim bynta ha kane ka jingshad ban pdiang burom ïa u snem thymmai.
