Shilong, K’Lyngkot 02
Ka United Democratic Party (UDP) ka la ong ba ka Congress kam khlaiñ shuh kumba long ha ki por ba la leit bad ka jingkylla kan sa wan ha kane ka ilekshon ban wan sha ka Lok Sabha.
“Kiei ki kam khraw ba ki MP na ki seng heh ka ri (National Party) hapoh ka Jylla ki la pyni ban ïasaid ïa ki mat kum ka jaidbynriew la bun-bun snem mynta,” la ong u General Secretary ka UDP, Dr. Jemino Mawthoh haba kynthoh ïa ki seng heh ka ri hapoh ka Jylla.
Haba kdew ba watla kan long ka jingmyntoi ïa kano-kano ka seng lada ka synshar lang ha ka Sorkar Pdeng kumjuh ha ka Jylla, utei u nongïalam ha kawei ka liang u la ong ba ïa mynta, ka BJP ka synshar tang hapoh ka Sorkar Pdeng hynrei ka seng ka tlot pat hapoh Meghalaya.
U la pynkynmaw ba hashuwa, ha ka por ba dang khlaiñ ka Congress ha ka Sorkar Pdeng, lada jied da u MP uba na Congress ruh kan biang palat hynrei kumba ka long mynta, ka Congress ka tlot hapoh Sorkar Pdeng bad ha Jylla kumjuh.
Haba pynsngew ba dei ban da khmih bniah ïa u briew haba phah sha ïingdorbar, u General Secretary u la ong ba u kyrtong uba ka RDA ka la pynïeng na bynta kane ka ilekshon ban wan sha ka Lok Sabha, Bah Robertjune Kharjahrin u long uba biang bha namar u dei ruh u nongïalam paidbah.
“Haba u rah ïa kano-kano ka mat, u da ngam jylliew bad u long ruh uba la ih bha. Nalor kane, u dei ruh u nongsaid aiñ bad u don ka mynsiem ban shakri. U long uba tbit bha ban trei bad kumta u long uba biang eh kum u kyrtong,” u la ong.
Ha kajuh ka por, haba pynpaw ka jingkyrmen ba kan don ka jingkylla ha kane ka ilekshon MP ban wan, u Dr. Mawthoh u la ong, “Ka Congress kam khlaiñ shuh, mynta ka don sa tang 5 ngut ki MLA. Bun ki nongïalam ki la phet noh bad kane ka jingïapait ka kdew ba ka Congress kam khlaiñ shuh kumba long mynshuwa.”
Haba bynrap ba ka VPP ka dang dei ka seng bathymmai, u la ong ba katkum ka risol jong ka ilekshon ba la dep, ka UDP ka la nang kiew bad ha ryngkat ka jingïatreilang bad HSPDP hapoh ka RDA, ka seng ka la nang khlaiñ shuh-shuh.
