Shillong, K’lyngkot 02
U MLA ka Sohra konstitwensi, u Bah Gavin M Mylliem u la ong ba ka jingdawa ka HNLC ïa u ban hiar shuki kum u MLA ka nang pynrhem ïa u ban shakri bad ka jingwan jong u sha kane ka bynta ban long u shakri paidbah ka dei lyngba ka jingibit u paidbah ban tynrong ha u ïa kane ka lyngkor.
U Bah Gavin u la pynpaw ïa kane haba kren sha ki lad pathai khubor ha ka Sngi Ba-ar halor ka jingdawa ka HNLC ba u dei ban hiar shuki kum u MLA ka Sohra bad shim jingkitkhlieh halor ka jingthmu ka Sorkar ban khang noh syndon ïa ka karkhana pynmih dewbilat MCCL.
U la ong ba ha ka jinglong briew ka don beit ka jingduna hangne-hangtai bad dei halor kane ba man ka por u ju buh ka jingkyrpad ïa ki paidbah ban buh jingduwai ha U Blei ba un ai ka jingstad jingshemphang ïa u kum u nongmihkhmat ban nang lah ban ai jingshakri shuh shuh ïa u paidbah ba bun ba lang bad kane ka jingbyrngem kan nang pynrhem shuh shuh ïa ka mynsiem jong u ban shakri kham bha ïa ki paidbah bad u ngeit ba haba u shakri bha, U Blei ruh u don ryngkat.
Kumta u la kyntu jur ïa ka HNLC ban nym pynmih kum kane ka jingkren bad kan da pule bha ruh ïa ka jingïaid lynti ka MCCL.
Une u MLA ka Sohra u la ong ba ïa u la jied da ki paidbah ka Sohra naduh u snem 2018 bad un ïai shakri ïa ki paidbah katba ki paidbah ki dang ai ka rai bad jingshaniah ïa u lyngba ka jingjied katkum ka aiñ kaba shah ban leh kumta.
Kumta u la ong ruh ba ki paidbah ka Sohra konstitwensi ki la tip bha ba ma u um pat ju kynran ha ka jingshakri ïa ki paidbah da ka jingkitkhia bad kane ka paw shynna lyngba ki kam pynroi kiba la ïohi hapoh ka konstitwensi naduh ba u la shahjied kum u MLA
Haba ïadei bad ka MCCL, u Bah Gavin u la ong ba ki paidbah ki tip ba ka MCCL bad ka jaka ba ka trei ka dei hapoh u pud u sam ka Shella konstitwensi ym hapoh u pud u sam ka Sohra konstitwensi kumba la don kiba la tharai.
“Na bynta kiba bun, lehse kin pyrkhat ba kane kan dei ka daw ba u MLA ka Sohra um sngewkhia haba ïadei bad ki kam kiba ïadei bad ka MCCL, bad ban shu ieh beit ha u MLA ka Shella. Hynrei namarba ki don bun ki nongtrei jong ka MCCL kiba hap ha u pud u sam ka Sohra konstitwensi bad namar ka jingsngewkhia lang ïa ki mat kiba dei jong ka Jylla kum ka MCCL, namar kan ktah ïa ka ïoh ka kot jong ka thaiñ baroh kawei, nga la shimkhia lang kumno ban kyntiew ïa ka MCCL. Ki paralok MLA ha Ïingdorbar (Assembly) ruh ki tip ba nga ju rah ïa kane ka mat man la ka por ban kyrpad ïa ka Sorkar ban don ka jingpyrkhat kaba khia haba ïadei bad ka MCCL,” la bynrap une u MLA.
