Shillong, K’Lyngkot 02
Ka Regional Democratic Alliance (RDA) ka khot bad wer ïa kiwei-kiwei ki seng ‘riewlum hapoh ka Jylla ban ïatreilang bad ka kynhun.
“Ka UDP naduh mynshuwa ka ju pyrshang ban pynïatylli ïa ki seng ‘riewlum hapoh ka Jylla namar ngi sngew ba ngi donkam tang kawei ka seng ‘riewlum kaba khlaiñ. Katba nang ïaid ki por, ka seng ka nang khlaiñ bad ka nang kiew ha ka jingdon ki nongmihkhmat kumjuh ha ka jingïoh ‘vote’,” la ong u General Secretary ka UDP uba dei ruh u dkhot ka RDA, Dr. Jemino Mawthoh.
Haba phai sha ka jingïatreilang jong ka UDP bad HSPDP hapoh ka shatri jong ka RDA, u la ong ba kane ka dang bteng haduh mynta bad kumba ka long, ka kynhun kam dei tang ka jingïatreilang hapdeng ki 2 seng, hynrei ka don ruh ka jingïasngewthuh jingmut ban pynsngew halor ki mat ba ïadei bad ka jaidbynriew.
“Ka jingïadei hapdeng ki 2 seng hapoh ka RDA ka ïai bteng bad ka kynhun ka khot ka wer ruh ïa kiwei ki seng ‘riewlum kum ka KHNAM ban ïatreilang namar ki mat, ajenda ki ïasyriem kumjuh,” u la ong da kaba bynrap, “Lada ki dang don shuh kiba kwah wan, ngi pdiang sngewbha bad ka jingkhang ka plie na bynta jong ki.”
Halor ka ilekshon ban wan sha ka Lok Sabha, u Dr. Mawthoh u la pynkynmaw ba ka RDA ka la ïashong jingïalang bunsien bad ka la shim ruh ïa ka rai ban pynïeng da u Bah Robertjune Kharjahrin ha kane ka ilekshon ban wan.
Haba kylli, u la ong, “Na ka liang jong baroh ar tylli ki seng, ka jingpynkhreh na bynta ka ilekshon ka la ïaid shaid-shaid bad u kyrtong ruh u la ïaid kylleng-kylleng.”
U la ong ruh ba ka seng ka kyrmen skhem ban poi sha ka thong ha kane ka kynti namar ka khlaiñ bad skhem bha ha Ri-lum Khasi-Jaiñtia.
Nalor kane, u Dr. Mawthoh u la pynsngew ba watla bun ki beiñ ïa ka seng hynrei, ka UDP ka la nang kiew ha ka liang ka jingïoh ‘vote’ bad mynta ha ryngkat ka jingïatreilang bad ka HSPDP hapoh ka RDA, ka nang ïoh bor shuh-shuh.
