Nongstoiñ, K’lyngkot 02
Naduh ki hep barit ki samla bad kiwei kiwei ki la mih sha khmat ban ïashim bynta shitrhem da kaba pynpaw ruh ïa ki sap ki talen ha ka rynsan ban rakhe snem thymmai ïa kaba la tip kum ka ” New Year Celebration 2024″ ba la pynlong da ka synjuk ki Seng Samla Shnong Mawthylliang West Khasi Hills ha ka 1 tarik u Kyllalyngkot, 2024.
Ïa katei ka rynsan ban lehkmen ïa u snem thymmai la pynlong ha madan jong ka shnong Mawthyliang kaba la pynshongshit haduh katta katta khamtam ïa ki heprit, ki samla katei ka shnong lyngba ki jingïalehkai bapher bapher.
Ïa katei ka jingrakhe snem thymmai la plie pyrda da u Dr. Ricky A.J Syngkon katba u Babu Birbor Riangtem uba dei uwei na ki ‘riew rangbah ka thaiñ Mawshynrut u la long kum u kongsan. Ha ka sngi pynkut ïa kane ka jingrakhe snem thymmai la donlang ruh ki nongkitkam ka synjuk ki Seng Samla Shnong Mawthyliang, ki ‘riew rangbah ka shnong bad kiwei kiwei.
Ka jingthmu jong ka synjuk ki Seng Samla Shnong Mawthylliang ban pynlong ïa katei ka rynsan jingïalehkai bapher bapher ka long shibynta ban rakhe snem thymmai ha kajuh ka por ban tehsong ïa ki khun shong khun thaw ban lait na kino-kino ki jingsniew kiba har rukom.
“Ngi lah ban trei ngi lah ban bylla ngi lah ban kamai kajih dei namar ba U Blei U don ha ka jingim ka jong ngi” la ong u Babu Birbor haba kren kum u kongsan ha katei ka sngi .
Nalor nangta u la ong ruh ba lada ka mynsiem ka jong u Blei ka la mih noh na ngi ngim ïapher shuh na ka khyndew. Kumta kum ki samla, ki heprit ki hap ban kynmaw ïa kane ka bynta, ngi ïoh ïa ka jingstad ngi pule bha dei lyngba ba ka mynsiem ka jong u Blei ka don ha ka mynsiem ka jong ngi. Kumta kine ki 360 tylli ki sngi bad 52 tylli ki taïew ngi hap ban ainguh ïa u Blei namar ba u don hapoh jong ngi.
Haba ngi don ka jingsheptieng ïa u Blei kam dei ba ngin klet noh ïa ki kmie ki kpa, hynrei kumba ngi tip ka burom ka akor ka kyntiew ïa ka shnong ka thaw ka kyntiew ruh ïa ka ri bad ka jaitbynriew bad tharai wat ki kmie ki kpa ki hynmen ki para kim jin la kmen lada ngi long kiba khlem akor hynrei kin kmen lada ngi don akor. Kumta burom ïa kiba la heh la san bad ngeit skhem ba na ka shnong Mawthylliang kan long ka jinghikai bad ka nuksa ïa ka thaiñ Mawshynrut.
U la ai ruh ka jingkhublei ïa ka shnong bad ka seng samla kaba la ïalam ïa kum katei ka prokram. U la ong ba dei ban kynmaw ba dei ban don ka jingïatylli khnang ba kan wanrah ka burom ïa ka shnong bad kan long ruh ka nuksa lane ka jinghikai ïa kiwei.
