Shillong, K’lyngkot 02
U MLA ka Sohra, u Bah Gavin M Mylliem u la kren ban pynshai halor ka jingkynnoh ka HNLC ïa u haba ïadei bad ka jinghap ka Mawmluh Cherra Ce-ments Limited (MCCL) bad ka jingdonkam ban khang noh shisyndon, ha kaba u la batai ruh ïa ka jingïaid lynti kane ka karkhana pynmih dewbilat bad ong ruh ba lada dei ban kylli bad pynngat jingkitkhlieh ïano ïano, la dei ruh ban pynngat ïa kito kiba la don ha ka bor naduh u snem 2007 shaneng ha kaba ka jingtreikam ka karkhana ka la hiar bad nang troiñ.
U Bah Gavin u la ong ba ka jingkynthoh ka HNLC ha u kyrwoh khubor jong ka pyrshah ïa u kum u MLA ka Sohra bad ban pynkitkhlieh ïa u halor ka jingkhyllem noh ka MCCL bad ka jingthmu ka Sorkar ban khang noh da kaba pyntreikam ïa ka VRS na ka bynta ki nongtrei ka dei ka bym don nongrim eiei.
“Baroh ki la tip ba kano-kano ka rai ba shim da ka Sorkar ka dei ka rai lang (collective decision) bad kam dei ka rai ba shim da marwei briew kumba la kynnoh ïa u shimet. Ka long kaei-kaei kaba thamula ba ka HNLC kan buh ba manga marwei ngan shim jingkitkhlieh namar ka rai kaba shim da ka Sorkar,” u la ong.
Une u MLA u la ong ba ma u shimet u don ban ong ba ka MCCL ka la poi ha u pud kumba long mynta ka dei namar bun ki daw, hynrei ban shu pynkitkhlieh tang ha u kum u MLA ka long kaei-kaei kaba khlem nongrim.
“Ha ka por ba nga shahjied kum u MLA ha u snem 2018, ka jingmong ka MCCL la dep don lypa bad lada dei ban kylli bad pynngat jingkitkhlieh ïano-ïano, la dei ruh ban pynngat ïa kito kiba la don ha ka bor naduh u snem 2007 shaneng ha kaba ka jingtreikam ka MCCL ka la hiar bad nang troiñ,” la ong u Bah Gavin.
Kumta u la ong ba ki jingshisha kiba la don, ki pynlyngngoh ïa u haba ka HNLC ka pynmih ka jingmaham pyrshah ïa u shimet bad ka pynlyngngoh ruh namarba katkum ba u tip, ka dei ka sien banyngkong ba ka HNLC ka pynmih kum kane ïa u MLA uba dang don ha ka samoi treikam bad kane ka pynlong ban shim ba kane ka seng kaba shah ñiew beaiñ ka don bynta ban leh saiñ hima sima ha ka Jylla.
U la ong ba kane ka pynlong ruh ban shim ba kane ka jingleh ka dei na ka bynta ka jingïalehkai saiñ hima sima jong kiba khwan myntoi, bad kum kane ka jingbyrngem pyrshah ïa u MLA uba don ka jingthmu babha na ka bynta ki paidbah bad ju kyrshan ïa ki paidbah ka konstitwensi khamtam ki duk ki jynjar ka wanrah ka jingartatien ïa ka jingleh jong ka seng.
U la ong ba kane ka jingong kaba bakla ka HNLC la pynshong nongrim tang ha ki jingtip ki bym dei bad duna ka jingtip shaphang ki jingshisha, bad u kyrmen ba ka HNLC kan kiar na kaba pynmih kum kine ki jingkren kiba ki bym don nongrim nangne shakhmat.
Une u MLA ka Sohra u la batai ruh shaphang ka jingïaid lynti ka MCCL naduh ba la sdang ha ka por ka Sorkar Assam kaba la tip kum ka Assam Cements Ltd ha ka 20 tarik Jymmang, 1955.
U Bah Gavin u la ong ba haba phai sha ka rukom treikam ka MCCL, la ïohi lyngba ki jingbuh jingthoh kiba ryntih ba ha u snem 1989-1990 haduh 2006-2007 kane ka kompani jong ka Jylla ka ïoh nong bad lait na ki ram ki shah bad ym donkam jingkyrshan nangno-nangno lane na ka Sorkar Jylla bad kum kane ka jingtreikam dei ban ai jingïaroh.
Hynrei naduh u snem 2007 shaneng, la sakhi ba ka ‘Wet Process Plant’ kaba la sdang naduh 15 tarik Naiwieng, 1966 ka hap ban mad jingeh bad ju jia ka jingsniew ki mashin kiba wanrah jingeh shisha nalor ka jingrim ki tiar ki tar bad kiwei kiwei ki jingdonkam kiba pynlong ban nang hiar kane ka karkhana.
Haba pynshai shuh shuh, u Bah Gavin u la kren ruh shaphang ka ‘Dry Process Plant’ kaba la treikam 9 snem hadien ba la buh por ba kan sdang treikam ha kaba ka jingmang pisa ruh ka kiew na ka T.85 klur sha ka T.143 klur nalor ka jingbym lah ban pynmih dewbilat kumba la buh ban pynmih bad ka jingbym lah ban pynbiang ïa ka jingdonkam ha ka jinglut jingsep ban pyntreikam bad ka jingmang bun ka ram katba nang ïaid ki sngi ki por nalor ka jingshah ktah ha ka por COVID-19 ba ka kompani kam lah pynmih dewbilat.
U la kren ruh shaphang ka jingpyrshang ban pynkhie im ïa ka MCCL kiba don lai tylli ki jingjied, kita, ban bei pisa ka Sorkar kaba donkam kumba T.188 klur, ka joint venture bad ki kompani shimet ban pynkhie im ïa ka MCCL, bad kaba lai ka long ban khang noh da kaba tyrwa skhim shongthait (Voluntary Retirement Scheme) noh ïa ki nongtrei ka MCCL.
Halor ka jingkhang noh bad pyntreikam VRS ïa ki nongtrei, u MLA u la pynkynmaw ruh ïa ka shithi na ka seng ki nongtrei ka MCCL ka Mawmluh Cherra Cements Employees Union (MCCEU) kaba la pynpaw ka jingkwah ban ïakren ïa ki jnit ki jnat bad ki kyndon haba pyntreikam ïa ka VRS halor ki nongrim kiba la batai.
“La sngewthuh ba ka Sorkar kan mad jingeh haba shim ïa ka rai haba ïadei bad kane hynrei nga kyrmen skhem ba ka Sorkar lyngba ka jingstad kan shim ka rai ka ban long na ka bynta ka jingmyntoi ki nongtrei bad ki briew ka thaiñ, bad ruh ïa ka Jylla baroh kawei,” la bynrap une u MLA.
