New Delhi, K’Lyngkot 02
Palat 370 ngut ki briew ki la lait im hadien ba ka liengsuiñ kaba ki la shong ka la kem ding namar ka jingtakhuh bad kawei pat ka liengsuiñ ha kad liengsuiñ Haneda kaba don ha Tokyo jong ka Ri Japan.
Katkum ki khubor, la ong ba katei ka liengsuiñ Japan Airlines ka la takhuh bad ka liengsuiñ jong ki shipai Coast Guard. Ki dur khih kiba la saphriang kylleng ha ki lad pathai khubor ki pyni ba katei ka liengsuiñ ba kit ïa ki 379 ngut ka la ïaid ha ka ‘runway’ jong ka kad liengsuiñ hashwa ba kan kem ding.
Katei ka liengsuiñ ba la kem ding ka dei ka Airbus A350 bad ka la kit ïa 379 ngut ki briew. Ki khubor ki ïathuh ba katei ka liengsuiñ ka dang shu wan na kad liengsuiñ Sapporo kaba don ha Hokkaido ha ki bynta ba shatei jong ka Japan.
Shuh shuh ki khubor ki ïathuh ba la hap ban pyndonkam haduh 70 tylli ki kali ban tem ïa ka ding kaba la klang na ka liengsuiñ.
Ha kawei pat ka liang, san ngut ki briew kiba la don ha ka liengsuiñ jong ki shipai Coast Guard ki la khlad noh. Kane ka liengsuiñ ki Coast Guard kaba la takhuh bad ka liengsuiñ Japan Airlines ka la don hynriew ngut ki briew. Ki don ki lad pathai khubor kiba la pyntip ba uwei na kine ki hynriew ngut u la lait im hadien ka jingtakhuh ki liengsuiñ.
