New Delhi, K’Lyngkot 02
Ka Sorkar Pdeng ka la pynlong ïa ka jingïakren bad ki nongïalam ka All India Motor Transport Congress ha ka Sngi Ba-Ar hadien ba ki nongñiah trok bad kiwei ki kali paidbah ki la pynlong da ka jingsangeh ban ïaid la kumba lai sngi eiei mynta.
Naduh ki khyndiat sngi ba la lah, ki nongñiah trok bad kiwei ki kali paidbah ba kynthup ruh ïa ki nongñiah ïa ki kali kit umphniang, ki la pynlong ïa ka jingsangeh ban ïaid kum shi bynta ban pyrshah halor ka kyndon kaba ïadei bad ka jingpynkiew ïa ka jingpynsaja pyrshah ïa kiba donkti ban tynrah briew ha surok khlem da wan ïathuh sha ki pulit halor kaei kaba la jia.
Mynta ka janmiet, u Secretary ka tnat Korbar Ri, u AK Bhalla, u la ïakren bad ki nongïalam ka All India Motor Transport Congress ha New Delhi halor ka jingpyrshah ka jong ki ïa ka kyndon 106 (2) jong ka Bharatiya Nyaya Sanhita lane BNS.
Kane ka BNS, ka ban mih bujli ïa ka Indian Penal Code (IPC), kaba dei ka aiñ naduh ka por ka sorkar Bilat, ka dei ka aiñ bathymmai ba la thmu ban pyntreikam da ka Sorkar Pdeng bad ka la ïoh ruh ïa ka jingmynjur na ka President jong ka Ri.
Katkum kane ka kyndon 106 (2), kino-kino kiba donkti ban tynrah briew ha surok bad ki bym wan ïathuh sha ki pulit ïa kaei kaba la jia, kin shah pynsaja da kaba tyngeh ha kaba kin hap shong patok haduh 10 snem bad nalorkata, kin hap ban siew ruh ïa ka kuna kaba T. 7 lak. Mynshwa, na ka bynta kane ka kam be-aiñ, ka jingpynsaja ka long da kaba shong patok kumba 2 snem bad ka kuna kaba kham sting.
Ki nongñiah trok bad kiwei ki kali paidbah ki kwah ïa ka Sorkar Pdeng ba kan pynkylla ïa katei ka kyndon 106 (2) jong ka BNS.
Ka jingsangeh ban ïaid ki trok ka la ktah sha kiba bun ki jaka ba kynthup ïa ka Jammu and Kashmir, Bihar, Punjab, Maharashtra, Madhya Pradesh, Himachal Pradesh bad Chhattisgarh. Naduh hynnin bad mynne, ki paidbah ki la leit ap ha kiba bun ki jaka theh umphniang namar ka jingsdang duna ka umphniang kali.
Hadien ba ka jingïakhih ka la sdang ban jur, ka Sorkar India ka la khot noh ïa ka All India Motor Transport Congress ban ïakren. Ka sorkar ka la pynshai ba katei ka aiñ BNS bad kiwei pat kim pat treikam satia haduh mynta.
Nalorkata, ka la ong ruh ba hashwa ban pyntreikam ïa ka kyndon 106(2) jong ka BNS, kan ïakren bad ïamir jingmut bad ka All India Motor Transport Congress. Ha kajuh ka por, ka sorkar ka la kyntu ïa kane ka kynhun bad ïa baroh ki nongñiah kali ba kin bteng biang ïa ka kam jong ki.
Na ka liang u Bal Malkit, Chairman ka Core Committee jong ka All India Motor Transport Congress u la ong ba haduh mynta, ka sorkar kam pat pyntreikam satia ïa ka BNS bad kan pyntreikam hadien ba la ïamir jingmut bad kane ka kynhun.
Kiba bun ki nongñiah trok bad kiwei ki kali paidbah ki la buh jingkylli ba kumno kin lah ban siew ïa ka kuna kaba haduh T. 7 lak lada ki kum tynrah ïano-ïano ha surok.
