Shillong, K’Lyngkot 02
Ki pulit ka East Jaiñtia Hills District ha ka step Lah Sngi U Blei ki la ïoh ban kurup ïa u drok ‘heroin’ uba shong dor T.6 klur na uwei u bar Jylla.
“Ha ka 1 tarik K’Lyngkot, 2024, ha ka por kumba 4 baje mynstep, la ïoh jingtip ba uwei u briew ba la tip kyrteng kum u Afjal Hussain Barbhuiya u la ñiah ïa ka kali kamai Tourist (Maruti Suzuki Ciaz) kaba don ïa u nombor ML-05-Q-1702 kaba kit ïa ki song mar be-aiñ bad kaba dang wan na Silchar sha Khliehriat,” la ong u SP ka East Jaiñtia Hills, u Giri Prasad M ha ka kyrwoh khubor.
Utei u heh pulit ka distrik u la ong ruh ba hadien katei, ka kynhun pulit ka East Jaiñtia Hills bad ka kynhun ANTF ka distrik ki la pynïeng ïa ka Naka hajan thanad Khliehriat, NH-06 hapoh ka jingïalam u B. Bhattacharjee, MPS, DSP (Crime) Khliehriat bad ha ka por 4:30 mynstep, la ïoh ban bat noh ïa katei ka kali ha ryngkat bad u nongñiah.
“Hadien, ynda la dep bud ryntih ïa ki kyndon katkum ka aiñ NDPS ha ka jingdonlang ki nongsakhi ba laitluid, la pynlong ka jingtalasi bad la lap ïa 66 tylli ki synduk sabon ba bun rong ha ryngkat ki jingsong ba la song ha ka plastik ïong na ka ‘Dash Board’ (Tool Box) bad na u ‘Bumper’ ba nakhmat,” la ong ka kyrwoh na u SP.
Ha kajuh ka por, la pynlong ïa ka jingpeit bniah ïa utei u mar ba suba dei u ‘heroin’ bad la shem ba u dei utei u jingdih pynbuaid uba don ïa ka jingkhia kaba 643.81 gram.
Ïa utei u ‘heroin’ la kurup noh bad song bha katkum ki kyndon hapoh ka aiñ NDPS. Nalor utei u jingdih, la kurup ruh ïa kawei ka ‘mobile’ bad 2 tylli ki ‘Sim Card’.
Haba ïadei bad kane, la pynngat mukotduma hapoh ka Khliehriat PS Case No. 01 (01) 2024 u/s 21(c)/29 NDPS Act bad ka jingtohkit ka dang ïaid ban lap ïa kiwei pat kiba donkti ha kane ka kam.
Na ka liang u Myntri Rangbah ka Jylla, u Conrad K. Sangma ha ka rynsan lad pathai u la ai jingïaroh ïa u DGP ka Jylla, Dr. L.R. Bishnoi lem bad ka tnad pulit ka Jylla baroh kawei halor ka jingïoh kurup ïa utei u ‘heroin’ uba shong dor T.6 klur.
