Khliehriat, K’Lyngkot 02
Ki pulit ka East Jaiñtia Hills District ki la ïoh kem noh ïa uwei u briew ïa uba la suba donkti halor ka jingshah pynïap kawei ka longkmie na Wapung Shnong ïa kaba la tip kyrteng kum ka (L) Kong Lita Ryngkhlem.
Kane ka longkmie ka la jah naduh ka 25 tarik Nohprah, 2023, hynrei la lap pat ïa ka met ïap jong ka ha ka step 31 tarik Nohprah na ka shnong Mookhep, East Jaiñtia Hills.
Une uba shah kem halor ka jingsuba ba u la donkti ban pynïap ïa ka Kong Lita u dei uba la tip kyrteng kum u Monkiru Chyrmang, 29 snem ka rta, uba na ka shnong Pamrapaithlu kaba don ha East Jaiñtia Hill.
Halor kane ka jingïoh kem ïa u Monkiru ka jingtohkit ki pulit ka la ïaid shakhmat.
Kumta na ka liang ka Jaiñtia National Council (JNC) Wapung Circle ka la ïaroh ïa ki pulit ka Ladrymbai Outpost bad VDP ka shnong Mookhep halor ka jingstad bad jingshalak ka jong ki ban kem noh ïa u runar uba la shim ïa ka jingim jong kawei ka longkmie na Wapung Shnong.
Ka JNC Wapung Circle lyngba u kyrwoh na u Distar Dkhar Vice President ka la ai ka jingïaroh ïa ki pulit ka Ladrymbai Outpost bad ïa ki VDP ka shnong Mookhep ba lyngba jong ki la kem ïa une u runar bad hadien ki la aiti noh ïa u sha ki pulit ka Ladrymbai Outpost.
Shuh shuh ka kyrwoh ka ong ba da ka jingstad ki pulit une u runar u la phla ba dei ma u uba la pynïap ïa katei ka longkmie.
Ka seng ka la kyrpad ïa ki bor jong ka aiñ ba kin leh da kaba tyngeh ïa une u runar khnang ba kiwei ruh kiba thmu ïa kum kane ka jait kam kin sheptieng bad kin pyrkhat ruh bunsien hashwa ban leh ïa ka.
