Shillong, K’lyngkot 02
Ka leit ka wan ki paidbah lyngba ka surok bah Shillong-Guwahati kan nym long kaba kylluid ha ki katto-katne bnai ki ban sa wan katba ka jingmaramot ïa ka bynta ba den ïa ka pung Umïam ka dang ïaid shakhmat. Ha kane ka jingmaramot ïa katei ka jingkieng la sakhi ki kali kiba hiar na Shillong bad kiba wan na Ri Bhoi ki hap ban ïeng laiñ bad sahkut ha ka dheng kali hashwa ban poi ha jingkieng ban jam na shiliang sha shiliang jong kane ka jaka ba den ïa ka pung Umïam.
Kane ka jingmaramot ka la ïaid mynta la katto-katne taïew ha kaba ki pulit ki la hap ban pahara beit miet la bad sngi ha kane ka jaka ban pyllait kylliang man la katto-katne minit ïa ki kali kiba hiar na Shillong bad ki kali kiba kiew ban leit sha Shillong.
La sakhi ba ki kali kiba hiar na Shillong ki hap ban ïeng laiñ bad ka dheng kali ka poi teng-teng naduh jingkieng shaduh ka jaka ba don ka jaka peitkai lane view point ha Mawlai. Kumjuh ruh ki kali kiba wan kiew sha Shillong ki hap ban ap ïa ka pali ban ïoh jam sha shiliang jong jingkieng.
Ha ki sngi ba kham bun lei lei ki kali kiba hiar bad kiba kiew, ka kham shimpor shuh shuh ïa ki kali ban lait na kane ka jaka namar ba la pyllait ban ïaid kali tang shiliang jong ka jingkieng katba kawei pat ka liang ka dang ïaid ka jingmaramot da ki briew ka kompani ITDCL.
Ki kali kiba hiar na Shillong ki ju sahkut ha ka dheng kali kaba jrong ha kaba ki kali ki hap ban ïeng laiñ bad ap ym duna ïa ka 20 minit haduh shiteng kynta ban ïoh jam sha shiliang jong ka jingkieng.
Kumjuh ruh ki kali kiba wan kiew sha Shillong da ki spah tylli ki sahkut ha ka dheng kali naduh ka lad Nongsder shaduh ka bynta shwa ban poi ha jingkieng ka pung Umïam.
Ki kali ki hap sahkut man la ka sngi ha ka dheng kali bad kane kan bteng sa katto katne bnai tad haduh ban da dep lut ban maramot ïa ka jaka ba den ïa ka Pung Umïam baroh arliang.
Dang shen na ka liang ki bor bahalor ka MeECL bad ki briew ka ITDCL ki la batai ba kane ka jingmaramot kan shimpor kumba 4 bnai ei ei bad ynda la dep ban maramot, ka jingshngaiñ kan long ïa ki paidbah bad kane ka jingmaramot kan nang pynkhlaiñ ïa ka jaka ba den ïa ka pung Umïam.
