Shillong, K’Lyngkot 03
Ka North Eastern Hill University Student’s Union (NEHUSU) ryngkat ka jingïasnohkti lang bad ka Education Cell jong ka Hynñiewtrep Youth Council (HYC) ka la ai por 10 sngi ïa ka Sorkar Jylla ba kan pyllait noh ïa ka baibam ne ka Scholarship jong u snem 2022-2023.
Ha ka Sngi Balang ki samla pule ki la pynlong ka jingïakhih ba jai jai namar ka jingpynslem jong ka sorkar jylla ban pyllait ïa ka baibam jong ki samla pule.
Haba kren sha ki lad pathai khubor, u General Secretary ka NEHUSU u samla Banpynbiang Riang u la ong ba kane ka jingpynslem ka Sorkar ban pyllait ïa ka scholarship ka la buh jingeh ïa ki samla pule khamtam kito kiba wan na ki longïing baduk.
U samla Banpynbiang u la kyntu ïa ka sorkar jylla ba ka dei ban pyllait kloi noh ïa ka scholarship kata hapoh shiphew sngi lym kumta ki samla pule kin pynlong syndon da ka jingïakhih kaba tyngeh. U la ong ba kane kam dei shuh ka sien ba nyngkong ba ki samla pule ki hap mih madan ban ïakhih tang na ka bynta ka Scholarship.
Une u nongïalam ka NEHUSU u la ong ba kane ka jingpynslem ïa ka Scholarship ka la pynbitar ïa ki samla pule bad u la byrngem ba kane ka jingleh ka Sorkar Jylla kan poi sha u pud ba ki samla pule kin hap buh noh u khulom bad rah da ki tiar ban ïakhih pyrshah ïa ka Sorkar Jylla.
Ha kawei pat ka liang, u President ka HYC Sengkmie u Bah Roykupar Synrem uba wan kyrshan ïa ka jingdawa jong ki samla pule u la ong, “Ka Sorkar Jylla kam dei ban ap pisa tang na ka Sorkar Pdeng hynrei ka dei ban pyndonkam da ka Contingency Fund ban siew ïa ka scholarship ki samla pule”.
U Bah Roykupar u la ong ba ka HYC ka kyrshan ïa ka rai jong ki samla pule ban ai por 10 sngi ïa ka Sorkar Jylla bad lada ka Sorkar kam shimkhia halor kane, ka seng kan sa shim da kiwei ki sienjam.
