Shillong, K’lyngkot 03
Ka President ka ri, ka Droupadi Murmu ka lah ban wan sha kane ka Jylla mynta u Kyllalyngkot ha ka 15 bad 16 tarik. Ha kane ka jingwan jong ka la pynkhreh ba kan donbynta ban plie ïa ka lympung ïalehkai Meghalaya Games ha Tura bad ban buh mawnongrim ban tei ïa ka Shillong Ropeway Project.
U nongaiktien ka Sorkar MDA u Bah Paul Lyngdoh, uba dei u Myntri Sorkar, u la ïathuh ba ka Sorkar Jylla ka dang ap ïa ka jingpyntikna na ka shlem treikam jong ka President, tangba ka jingpynkhreh ïa ka jingwan jong ka President ka la don lypa ha kaba kan donbynta ban plie ïa ka Meghalaya Games ha Tura ha ka 15 tarik bad bud sa ka jingbuh mawnongrim ban tei ïa ka Shillong Ropeway Project ha ka 16 tarik.
Ka Meghalaya Games kan long ha Tura naduh ka 15 tarik haduh 20 tarik Kyllalyngkot ha kaba kin don palat 3000 ngut ki nongïalehkai ki ban shimbynta ha ki jingïalehkai bapher bapher kiba la pynkhreh kumba 22 jait ki jingïalehkai.
Haba phai sha ka ropeway project, ka jingmang pisa kan kot sha ka T.138 klur ha kaba yn tei ïa ka Lower Terminal Point (LTP) ha Rait Laban bad ïa ka Upper Terminal Point yn tei ha Lum Shyllong.
Kin don bun jait ki jingtei jingshna naduh ki jaka shongkai pyngngad bad kiwei kiwei ki jingdonkam na ka bynta ki paidbah kiba pyndonkam ïa ka ropeway ban leit kai sha Lum Shyllong bad haba wan hiar na Lum Shyllong sha nongbah Shillong.
