Shillong, K’lyngkot 03
Ka Sorkar Jylla ka la sdang plie biang ïa ki shlem treikam jong ki tnat treikam bapher bapher jong ka naduh ka 2 tarik mynta u bnai hadien ka shuti Khrist-mas bad Snem Thymmai, hynrei bun ki kamra treikam ha Secretariat ki dang thylli, bad napdeng ki 12 ngut ki Myntri Sorkar, tang u Bah Paul Lyngdoh uba poi trei ha ka Sngi Balang.
Ki kamra ba shong ki Myntri Sorkar bad ki MLA ruh ki dang thylli namar kim pat wan trei. La ong ba ki don ruh ki heh ki haiñ kiba dang leit shuti ha kane ka por Khristmas bad Snem Thymmai sha la shnong bad ki don ki Myntri Sorkar bad MLA kiba leit sha la ki jong ki konstitwensi bad don ruh kiba leit kai shi ïing shi sem shabar na ka Jylla.
Napdeng ki 12 ngut ki Myntri Sorkar, la lap ba tang u Bah Paul Lyngdoh uba wan sha Secretariat ha ka Sngi Balang ha kaba ki don ruh ki briew kiba wan ban ïakynduh ha kamra treikam jong u ha Secretariat.
Katba ki kamra jong kiwei pat ki Myntri Sorkar ki kynjah jar jar namarba kim pat wan trei bad ki don ruh ki kamra jong ki MLA kiba thylli kumjuh ruh katto-katne ki ophisar. La sakhi ba ki lynti ïaid ba don ki kamra jong ki Myntri Sorkar bad ki MLA ruh ki kup da ka dur kaba kynjah namarba dang duna ki paidbah kiba wan donkam ne wan ïakynduh ïa ki heh ki haiñ ha Secretariat.
Ki nongtrei Sorkar ki la ïoh shuti kham bun sngi naduh ka 23 tarik Nohprah 2023 haduh 1 tarik Kyllalyngkot 2024.
